Uuliamik kinertumik nunarsuaq tamakkerlugu inerteqquteqarnissaq RAL-ip isumaqatigaa

Issittup imartaani uuliamik kinertumik atuinueqqusaajunnaarnissamik siunnersuutigineqartoq, Royal Arctic Line-ip pisortaata Verner Hammeken isumassarsiatsialaasutut isigaa.
septembarip 27-at 2016 06:26

- Avatangiisitsinnut tamatta ullumikkut siunissamullu akisussaavugut. Taamaammat iliuusitta avatangiisinut sunniutaasa pitsaanerulersinnissaaa Royal Arctic Line-mi tapersersorparput, Verner Hammeken oqarpoq.

Uuliap kinertup nunarsuaq tamakkerlugu inerteqqutaaleqqullugu Danmarkip naalakkersuisui Naalagaaffiit Peqatigiit Imavinni Angallanneq pillugu Suleqatigiiffianut kimigiiseqqullugit, Danmarkimi Umiarsuaatillit peqatigiiffia sapaatip akunnerani qaangiuttumi kaammattuuteqarnera, Verner Hammeken ilannguffigaa.

Tamannalu nunarsuaq tamakkerlugu suliniaqatigiiffimmi WWF-iminngaannit nuannaarutigaat.

- Issittup imartaani uuliamik kinertumik atuinissap inerteqqutaalernissanik Umiarsuaateqarfiit namminneq oqariartuuteqarnera Nunarsuaq tamakkerlugu suliniaqatigiiffimminngaanniit nuannaarutigisorujussuuarput.
Taama Kaare Winther Hansen oqarpoq.

Tassami uulia kinertoq atortillugu avatangiisit ajoquserneqarsinnaasut, Kaare Winther Hansen itisilerpaa.

- Ingammik timmissat uuliakoorfigineqaraangamik oqorsaataaruttaramik nungutaasinnaapput. Aamma puisit imarmiullu miluumasut allat toqqutigisinnaasaminnik ajoqusersinnaapput.

Uuliap kinertup orsussatut atorneqarnera mingutsitsisssutaasupilussuuvoq paaliortitsisarlunilu, Issittup sikuanut siaruaattartumik, taavalu Issittumi silap kiannerulerneranut pissutaaqataalluni.

RAL-imilu uuliamik kinertumik maannakkorpiaq atuisuupput,  aatsaallu nunarsuaq tamakkerlugu inerteqqutigineqalerpat,  umiarsuaatimini atorunnaarniarlugu. Tassami uulia allaaneq marloriaammik akeqarpoq, RAL-ilu kisimiilluni atuiunnaaraluarpat unammillersinnaaneraa  ajornakusuulissalluni.

- Siulliugutta allallu kalinnagit, iluaqutaanavianngilaq. Umiarsuaateqarfiit allat killilersorneqaratik  angalannarsinnaassapput.

Sulisitsisut peqatigiiffianni, GE-mi, siunnersuut aamma tusarsimavaat.

Politikerilli inuussutissarsiortullu inerteqquteqarnissamut tapersuisuitigatik paasissutissanilli pingaaruteqartunik pisariaqartitsisut, taakkua isumaqarput.

- Qanoq akeqassanersoq, qanoq sukkatigisumik atuutilersineqassanersoq inuussutissarsiornermullu qanoq kinguneqassanersoq apeqqutaavoq, Brian Buus Pedersen taama oqarpoq.