Umiarsualiviup saqitsaassutaanera eqqartuussivimmi aalajangiiffigineqassaaq
Nuummi umiarsualiviup allileriffigineqarnera siorna novembarip 15-iani naammassineqartussaagaluarpoq, ukioq mannali juulimi aatsaat naammassineqassangatinneqalerpoq. Naatsorsuutigisamit qaammatinik arfineq-pingasunik kinguaattoorutigineqarluni.
Kinguaattoorutigineqarneralu umiarsualivimmik piginnittup Sikuki Harbour A/S-ip sanaartortullu Per Aarsleff Grønland ApS-ip akornanni saqitsaassutigineqalerpoq.
AAMMA ATUARUK Nuummi umiarsualivittaassaq aasaru aatsaat naammassineqassaaq
Ukiullu ilimagisamit sakkortunerusimanera pissutigalugu qaammatini ilassutaasuni sulinerup kimit akilerneqarnissaa illuatungeriit isumaqatigiinngissutigaat. Sikuki Harbour A/S-ip ukiumoortumik nalunaarusiaani tamanna atuarneqarsinnaavoq:
- Piffissamik sivitsuinissaq ilassutitullu akiliuteqartornissaa sanaartortup piumasaqaatigaa. Tamannali Sikuki Nuuk Harbour A/S-ip itigartitsissutigaa, tunniussinissap kinguaattoorutigineqarneranut isumaqatigiissummi aalajangersakkat naapertorlugit akiliuteqartoqarnissaa innersuussutigalugu, suliffeqarfik Namminersorlutik Oqartussanit pigineqartoq ukiumoortumik nalunaarusiamini taama allappoq.
Piginnittup sanaartortullu saqitsaassuteqarnerat isumaqatigiissitsiniarnikkut aalajangiiffigineqartussanngorpoq, tamannali qaqugu pissanersoq suli aalajangerneqanngilaq.
KNR-ip Sikuki Harbour A/S attaveqarfigaa, Per Aarsleff ApS-imulli saqitsaanneq oqaaseqarfigiumaneqanngilaq.
Isumaqatigiissummi allassimasoq malillugu suliaq piginnittup sanaartortullu akornanni isumaqatigiissitsiniarnertut aalajangiiffigineqassaaq. Sikuki Harbour A/S-ip siulersuisuni siulittaasoq Lars Karlsen KNR-imut oqarpoq.
- Sanaartorneq qaammatinik arfinilinnik amerlanerusunik kinguaattuulersoq takusinnaaneraanni taama isumaqatigiissutaasimasut qiviaqqinneqassapput tassanilu suliaq isumaqatigiissitsiniarnertut aalajangiiffigineqassasoq allassimavoq, siulittaasoq KNR-imut oqarpoq, nangillunilu oqaatigaa pineqartut marluk akornanni suli ajunngitsumik oqaloqatigiittoqartoq.
