Arctic Circle Race: Ulloq siulleq nukeerutiivikkama pikkunarnerpaavoq
- Qularutiginagu oqassaanga ulloq siulleq pikkunavissorpoq
Kalaaleq ujakkaarluni ooqattaasartartoq, Ukaleq Slettemark nunarsuarmi ujakkaarluni unamminermi sakkortunerpaami arnat 160 kilometerimi unammineranni siulliulluni apuuttoq oqarpoq. Taassuma allat 180-it Sisimiuni Arctic Circle Race-imi unammeqatigai.
Ukaleq Slettemark aatsaat siullermeerluni peqataavoq, taanna ulloq siulleq 'nukeerutiivissimalluni' oqarpoq, ullulli allat marluk eqqissiviilluni ingerlasimanerarpoq.
Aallartinnginnermi pissannganeq
KNR-ip ajugaasussatut ilimagineqartut unamminerup aallartinngilaarnerani naapippai, pissangasoqarporlu.
- Qanoq sukkatigisumik ingerlassanerlunga nalulluinnarpara, pissangasorujussuuvunga, Ukaleq Slettemark oqarpoq.
Angutit 160 kilometerimut unammineranni ajugaasussatut ilimagineqareersoq, martin Møller aamma pissanngasimavoq.
- Aap pissanganarpoq, neriuppunga qulissaanik ajugaassallunga, taanna unamminerup borgmesterimit Malik Berthelsenimit aallartinneqanngilaarnerani oqarpoq.
Sinilluanngitsut
Pinngortitami ulluni marlunni unnuinerup 160 kilometerinillu isorartussuseqartumi unamminerup kingorna naatsorsuutigineqartutulli Martin Møller apuuteqqaartuuvoq. Taanna taamaalilluni qulissaani ajugaasimasutut imminut taasinnaalerpoq. Taassumalu unamminertik nuannarisimagaa tusaaneqarsinnaavoq.
- Nuannerluinnaqqissaarpoq, silagissuaq, løjpillu ingerlaarfigut pitsaalluinnarput, taanna apuuffissaminut apuukkami oqarpoq.
100 kilometerinik isorartussuseqartumi unamminermi Majaq Heilmann angutini siulliulluni apuuteqqaartuuvoq. Ullunilu marlunni tupermi unnuineq ajugaasup apuunnerani malugineqarsinnaavoq.
- Unnuk siulleq sinilluanngitsoorrakkunarpugut amerlasuut. Taava unnuaq una kingulleq kiannerulaariarami taavalu inuit eqqissisimaneroriaramik pisuttoqarpallaarunarani silami, sinilluarrrannerorpasippugut, sinilluarneruvunga uanga, taanna ajugaanermi kingorna oqarpoq.
Arnat unammineranni 160 kilometerimi unamminermi ilimagineqareersutut Ukaleq Slettemark ajugaavoq. Hemi Heilmannilu 100 kilometerimi ajugaalluni.
