Pituffik: Sanaartornerup kinguaattoornera akisusoq
Aviisi ullormut saqqummersartoq Licitationen taama allaaserisaqarpoq.
Sanaartornermut atortussat Qallunaat Nunaannit Pituffimmukaanneqartussat umiarsuarmut allamut assartuunneqartussanngorlugit amerikamiut illersornissamut ministereqarfiata aalajangeriasaarpaa.
Umiarsuaatileqatigiiffimmut nutaamut aningaasat atorneqartussat immikkullu aningaasartuutaasussat pillugit piffissaagallartillugu angumerineqanngitsoorput, taamaalilluni Qallunaat Nunaannit Pituffimmut umiarsuakkut assartuinissaq angumerineqanngitsoorpoq.
- Pituffimmut amerikamiullu illersornissamut ministereqarfianut suli isumaqatigiissuteqarpugut, immikkut aningaasaliissutit inissinneqarnissaat kinguaattoorutigineqarmata - atortussat ukiormanna anngussinnaanngillat taamaattumik sanaartornissarput kinguartinneqarpoq, Adserballe Knudsen Greenlandimilu pisortaq, Niels Laursen aviisimut Licitationen - Byggeriets Dagbladimut taama oqarpoq.
AAMMA ATUARUK Kiffartuussinissamik isumaqatigiissuteqannginneq RAL-imi qissatigineqanngitsoq
Kinguaattoorneq qanoq naleqassanersoq oqaatigisinnaannginnerarpaa. USA-lli Københavnimi aallartitaqarfiata malittarisassat malissimagai oqaatigaa, amerikamiullu Kalaallit Nunaannut assartuinissamut annerusumik soqutiginnissimanngitsut oqaatigalugu.
Maannali soqutiginnittoqarpoq, taamaalilluni Royal Arctic Line atortussanik Pituffimmut assartuisussaajunnaarpoq.
- Oqaluttuarisaanermi Pituffimmut umiarsuakkut assartuisalerneq taamaallaat qallunaanit soqutigineqarpoq, isorartunera pissutigalugu. Umiarsuarmilli assartuisalernissamut amerikamiut suliffeqarfiat suliariumannittussarsiornermi neqeroorpoq, piumasaqaatillu naapertorlugit maanna suliakkinneqarluni,
amerikamiut aallartitaqarfiani pisortat suliassaqarfianni pisortaq, Daniel J. Ernst oqarpoq.