Kiffartuussinissamik isumaqatigiissuteqannginneq RAL-imi qissatigineqanngitsoq
Kalaallit umiarsuutileqatigiiffiat umiarsuakkut angallassinermi nunatta avannaanut amerikamiut sakkutooqarfianukartarunnaassasut, US Air Forcep sapaatip akunnerata siuliani nalunaarfigai. Arktisknyt.dk taama allaaserisaqarpoq.
Royal Arctic Linep kiffartuussinissamut isumaqatigiissuteqarniarnermut suliariumannittussarsiuussineq amerikamiut suliffeqarfiutaata Schuyler Line Navigationip Marylandimeersup 57 millionit koruuninut ukiuni marlunni suliaqarniartuni neqerooruteqarneratigut isumaqatigiissuteqarfiginngitsoorpaa.
RAL-ip pisortaa, Verner Hammeken KNR-imut oqaluttuarpoq isumaqatigiissuteqanngitsoornertik uggornaraluartoq, suliariumannittussarsiuussinerup naammassineqarnera sininnaviissutiginaviarnagu.
- Tamatumanit uppisinneqarnavianngilagut. Missingersuutitta ataqatigiinnissaanut isumaqatigiissuteqarnissaq pingaaruteqanngilaq, Verner Hammeken oqarpoq.
Umiarsuaatileqatigiiffik isumaqatigiissuteqaqaqqissimasuuguni taamaallaat ukiumoortumik isertitami 1 procentiinik iluanaaruteqarsinnaassagaluarpoq.
- Ingerlaqqiinnassaagut allamillu suliassarsiorluta. Matumik matusoqaraangat allamik ammartoqartarpoq, Verner Hammeken oqarpoq.
Ajorsarnerannut peqqut ilisimaneqanngitsoq
Pisortaq naapertorlugu RAL-ip umiarsuakkut usinik angallassinissamut amerikamiut suliffeqarfiutaata neqeroorutigisaanit 57 millionit koruuninit ikinnerungaatsiartut neqeroorutigisimagaluarpai.
Hammekenip amerikamiut aallartitaat sapaatip akunnerata tulliani ataatsimeeqatigissavaa, tassanilu sooq amerikamiut suliffeqarfiutaat RAL-imut suliffeqarfinnullu allanut aamma neqerooruteqarsimasunut ajugaanersoq paasissutissiissutigineqassaaq.
- Tunngaviusup paasinissaa qilanaaraarput.
Kiffartuussinissamik isumaqatigiissut annaaneqaraluartoq nunarput suliffissanik annaasaqassanngitsoq, Hammeken naliliivoq
