Mâliâraq Vebæk ullumi 100-liissagaluarpoq
Narsaq Kujallermi apriilip 20-ani 1917-imi inunngorpoq, Kujataamiullu kulturiannik - oqaluttuanik nipilersukkanillu - inuunini naallugu soqutigisaqartuulluni.
Itsarnisarsiooq danskeq uitaarivaa, uimilu sulineranut atatillugu Nunarput angallavigisimallugu.
Angalasarnerminilu immiussissummik 1949-imit nassartalerpoq, sumiiffinni assigiinngitsuni oqaluttuanik erinarsuutinillu katersilluni.
Kujataanilu meeraaffigisamini 1960-ikkunni immiussiartorluni angalavoq, atuakkanillu arlalinnik saqqummersitsivoq oqaluttuat erinarsuutillu kinguaassanut isumannaarumallugit.
Danmarkimi arnanik kalaallinik naapitaqartarnini isumassarsiorfigalugu atuagaq "Bussimi naapinneq" 1982-imi saqqummersippaa. Atuagaq taanna Nunatsinni meeqqat atuarfianni atuarsimasassanut aalajangersimasunut ullumikkut ilaavoq.
Mâliâraq Vebæk 95-inik ukioqarluni 2012-mi toqunnginnermini arlalinnik nersornaatisivoq.
Ukiunik 100-nngortorsiorneq Nuummi Nunatta Atuagaateqarfiani unnugu malunnartinniarneqassaaq. Mâliâraq Vebækip atuakkiai Eva Møller Thomassenip Margrethe Thårup Andersenillu oqaluttuarissavaat.
Aaqqissuussineq nalunaaqutaq 19.30 aallartissaaq.