Puisit amiinik tunisassiat Canadami nersorniaraat
The National Seal Products Day inatsisitigut marlunngormat pisortatigoortunngortinneqarpoq, maajip 20-ani siullermeerutaasumik nalliuttorsiutigineqarluni.
Inatsisissatut siunnersuut Inatsisartuni ilaasortap Newfoundlandimeersup Scott Simmsip Canadami inatsisartuni saqqummiuppaa ingerlaannartumillu inatsisinngortinneqarpoq.
Scott Simmsip CBC Newsimut oqaatigaa puisimit tunisassiat, nunarsuarmi akuerineqaleraluttuinnartut nunani assigiinngitsorpassuarni pisiarineqarsinnaaleriartuinnartut ullorititami nersorniarneqassasut.
Tamatumunngalu peqatigitillugu puisit kulturikkut pingaaruteqassusiat Canadamilu issittullu sinnerani puisinniartarnerup aningaasarsiornermut pingaaruteqarnerujussua nalliuttorsiutigineqassaaq.
Inatsit EU-p puisit amiinik tunisassianik eqqusseqqusinnginneranut qisuariaataavoq.
The National Seal Products Dayiunissaanut toqqaasoqarnera nalaatsornerinnaanngilaq, EU-mimi European Maritime Day ulloq taanna nalliuttorsiutigineqassaaq, Europami imaatigut suliffissuaqarneq immikkut sammineqassalluni.
