Piffissami killligaanngitsumi pisassiissutit utertinneqarnissaat innersuussutigineqartoq
Piffissami killiligaanngitsumi pisassiissutit utertinneqarsinnaasut, kukkunersiuisarfiup BDO-p nalunaarusiaata inerniliuppaa.
Pisassiissutilli utertinneqannginnerini pisassiissuteqartut ukiut tallimat sioqqullugit kalerrinneqassasut, BDO-miit pingaartinneqarpoq.
Piffissamilu killiligaanngitsumi pisassiissutit utertinneqarnerisa kingorna qanoq pisassiissutissiinissamut iliortoqassanersoq BDO innersuussuteqarpoq.
Aamma atuaruk Inassutigineqartut aalisarnerup iluani malinneqanngillat
Kukkunersiuisullu innersuussutaanni sisamaasuni, piffissami killiligaanngitsumi akuersissutit piffissap ingerlanerani utertinneqarnissaat, utertinneqarnerilu ilutigalugit piffissamik killilikkanik akuersissutinik kaattaassisoqartarnissaa pitsaanerpaatut ersersinniarneqarpoq.
Aalisartullu pitsaanerpaamik periarfissinniarlugit piffissami killilikkami pisassiissutissat ukiuni qulini sivisunermilluunniit atuuttussaassasut, BDO-p innersuussutigaa.
Nalunaarusiamili aamma inerniliunneqarpoq, piffissami killiligaanngitsumi pisassiisarnerit aningaasanik isertitsinissamut piujuaannartumillu aalisarnemut anguniakkat amerlasuutigut eqqortikkaat, inuiaqatigiinnullu iluanaaruteqartitsisarlutik.
Aamma atuaruk Krusep aalisartut amerlanerunissaat kissaatigaa
Nikolaj Jeremiassenip Inatsisartut siorna upernaakkut ataatsimiinneranni piffissami killiligaanngitsumi raajartassiissutit qaleralittassiissutillu utertinneqarnissaannut periarfissanik Naalakkersuisut misissuinissaannik peqquneqarnissaannik aalajangiiffigisassatut siunnersuuteqarnera misissuinermut pissutaavoq.
