Krusep aalisartut amerlanerunissaat kissaatigaa
Maannalu Naalakkersuisunit inatsisip allangortinneqarnissaanut siunnersuisuuteqarput. Tassalu aalisartut angallatiminnik isaterititsiniartut aningaasartuutinut tapertillutik nutaamik angallatitaarsinnaalissasut siunnersuutigaat.
Tapiissutit siunertaat taamaasilluni killormorluinnaq saatsinniarneqarpoq.
Læs også Aalisartut amerliartornerat kingunerlutsitsissaaq
Aalisarnermut naalakkersuisup Karl-Kristian Krusep taamaasilluni aappaagumut Naalakkersuisoqatimi aningaasaqarnermut inatsisissamut siunnersuutaa akerlileqqipaa.
- Inatsisip allanngortinniarneqarnerani massakkut allannguutissaa tassaaneruvoq angallammi isaterititsinermi akuersissutit pigiinnarneqarsinnaanerannik inatsit imaqartinneqassasoq, taamaalilluni ullumikkut angallatit ineriartoqqissinnaanerannut periarfissaq ammasinnaalissalluni, Karl Kristian Kruse oqarpoq.
Nunatta aalisarnermik inuussutissarsiuteqarnerata imminut akilersinnaanissaa taavalu aalisarnerup aalisartunut ataasiakkaanut pissarsiaqaataaneroqqullugu aalisartut ikilisarneqarnissaat, Inatsimmi siunertaagaluarpoq.
Sulisitsisut Peqatigiiffiata inatsimmut allannguutissatut siunnersuut isornartorsiorpaa. Isumaqarput inatsisip siunertaa killormorluinnaq saatillugu aalisartut allatut poorlugu tunissuteqarfiginiarneqartut.
Læs også Aalisarneq kisimi isumalluutaassanngilaq
Inatsimmut allannguutissatut siunnersuut Inatsisartunit akuerineqassappat aalisartut aalisarnermut uppernarsaatitik pigiinnarsinnaalertussaavaat, naak angallatimik isatertinneranut aningaasanik tunineqareeraluarlutik.
Aalisarnermut Naalakkersuisoqarfiup 2016-imut aningaasanut iniatsisissatut siunnersuummi inerniliuppaa, Nunatsinni aalisartut amerlavallaartut, taamaanneranu aalisartut namminneq aningaasarsiornerannut inuiaqatigiillu aningaasarnerannut sunniinerlussasoq.
Aalisarnermulli naalakkersuisup Aningaasanut Inatsisissami aalisarnermut tunngasortaani allassimasut isumaqatiginagit aammaarluni erseqqissarpaa naqissuserlugulu sinerissamut qanittumik aalisartut amerlanerunissaat kissaatigigini, allannguutissatullu siunnersuut tamatumunnga iluaqutaassasoq neriuutigigini.
- Inuit angallatiminnik namminneq ingerlataqartut annerusumik ikaliartorsimanngillat - ikiliartuaarput. akerlianik Kisiannili selskabit immaqa assigiinngitsut angallatitigut pigisaqarnerat annertusiartorluni, Aalisarnermut naalakkersuisoq Karl-Kristian Kruse oqarpoq.
