Sume pillugit filmiliaq DR2-kkut unnugu aallakaatinneqassaaq
Nipilersoqatigiit Sume, kiffaanngissusermik oqartussaaqataanissamillu 70-ikkunni nipilersornermikkut oqariartuuteqartut pillugit piviusulersaarut, naliliisartunit pitsaalluinnartumik nalilerneqartoq nersornaasigaasimasorlu kalaallit Danmarkimi najugaqartut kiisami isiginnaarsinnaanngorpaat.
Ilitsersuisoq Inuk Silis Høegh filmiliornermi aqutsisuusoq Emile Hertling Peronard filmiliartik Sume – Mumisitsinerup nipaa Canadami illoqarfimmi Torontomi Imaginative filmfestivalimi oktobarimi ingerlanneqartumi filmiliortunut nutaanut isumalluartunullu nersornaatinik tunineqarput.
Aamma atuaruk Sume - Mumisitsinerup Nipaa marlunnik akissarsitinneqarpoq
Unnugu nalunaaqutaq qulinut DR2-p Nunatsinnut tunngasunik aallakaatitseqattaarnini nangillugit Christoffer Guldbramsenip filmilia "Grønland - år 0" aallakaatissavaa, taanna Nunatsinni aatsitassanut, tamakkulu inuiaqatigiinnut kalaallinut angisuumik sunniuteqarnissaannut tunngasuuvoq.
Kingulliullugu DR2-mi unnugu aqqanermut aallakaatinneqassaaq filmi piviusulersaarut "Byen ved verdens ende", tassani pineqarluni Uummannap eqqaaniittoq nunaqarfik Niaqornat, nunaqarfimmiullu nunaqarfiup ataannarnissaannut ilungersuuteqarnerannut tunngasoq. Tassani ilaatigut politikeri Karl Kristian Kruse filmimi inuttanut pingaarnernut ilaavoq. Filmi taanna 2013-imeersuuvoq.
Aamma atuaruk Sume pillugit filmiliaq Canadami radiokkut aallakaatitassiami nuannarineqarluartumi sammineqartoq
Pingasunngorpat unnukkut Nunatsinnut tunngasunik sammisaqarneq nangillugu Ditte Haarløv Johnsenip filmiliaa ”Hjemløs” Danmarkimi nal. malillugu 23.00 aamma aallakaatinneqassaaq.