Sume - Mumisitsinerup Nipaa marlunnik akissarsitinneqarpoq

Nipilersoqatigiit Sumikkut pillugit filmiliaq, Sumi - Mumisitsinerup Nipaa, Canadami filmfestivalernermi marlunnik akissarsitinneqarpoq.
oktobarip 26-at 2014 18:43

Filmfestivali nunat inoqqaavisa filmiliaannik unammisitsisartoq, Imaginative, illoqarfimmi Torontomi ippassaq ingerlanneqarpoq, filmilu Nunatta avataani siullerpaamik takutinneqarluni.

 

Filmiliortut, Inuk Silis Høeghip aamma Emile Hertling Peronardip pissanngatigisimaqaat filmip takutinneqarnera naggueqatitsinnit qanoq nuannarineqartigissanersoq.

 

- Filmiliarput soqutigineqaqaaq. Tamanna malugaarput akissarsinitta kingorna oqalugiareernittalu kingorna inunnik oqaloqatigineqarnitsigut.

 

Inuk Silis Høegh oqaluttuarpoq nuannaarutiginerarlugulu oqaatigalugu, nunat inoqqaavisa filmi paasisinnaanerarlugu oqalummata, tassami pissutsit Nunatsinni atugaasimasut assiginik nunani aallani aamma pisoqartarsimammat.

 

- Malunnarpoq filmimi sammineqartut soqutigineqarluarneri tassami oqaluttuarneri naapertorlugit, Nunatsinni pisimasut oqaluttuarisaanitsinnilu misigismasagut aamma namminneq nunasiaataasimanerminni misigisarsimagamikkit.

 

Akissarsissutigineqartut tassaapput, Cynthia Lickers-Sagep akissarsissutigitittagaa pernaammik filmiliortut pikkorissutsiminnik takutitsilluartunut aamma pernaammik filmiloqqaartunut akissarsissutigitinneqartartoq Jane Glasscomit tunniunneqartartoq.

 

- Tamanna tulluusimaarnaqaaq. Emile Hertling Peronardilu marluulluta nuannaaqaagut taama akissarsitinneqarnerput pillugu, Inuk Silis Høegh oqarpoq.

 

Taassumalu neriuutigaa filmi nunarsuatsinni allani aamma soqutigineqarnerulerumaartoq.

 

- Neriuutigaarput filmiliatta nunani allani aamma saqqummersinneqarnissaa. Tassami maanna oqarsinnaanngorput, Imaginative filmfestivalimi marlunnik akissarsitinneqarsimasoq.

 

Nipilersoqatigiinnik Sumikkunnik filmilioqataasoq, Inuk Silis Høegh tulluusimaaqisoq taama oqaluttuarpoq. Taassuma filmilioqataatalu Emile Hertling Peronardip suliassaasa tulleraat Sundance Filmfestivalimut peqataasinnaanissaq.