Suliffeqarfissuit Doris tunngavissaqannginnerarpaat

- Siunnersuutigivara, suliffissaaleqineq 3 % qaangersimagaangagu taava pinngitsoorani ilinniarsimanngitsut nunatsinnut sulisussatut tikisinneqartartut unitsinneqartariaqartut. Soorlu savalimmiuni taamatut iliortoqartartoq, Doris Jakobsen oqarpoq.

Kisianni misissuinitsinni paasivarput nunatsinni sanaartornermik suliallit nunaqavissunik sulisoqarusunnerusartut.

Ilulissani Aasiannilu sanaartornermik ingerlatsisut KJ Greenland nunaqavissunik sulisoqartarput, ulapaarfiusunili nunatta avataaneersunik tikisitsisarlutik. Suliffeqarfik 75-nik illoqarfinni marlunni sulisoqarpoq. Aasianni arlalinnik suliassaqarnertik pissutigalugu, nunatta avataaneersunik arfineq marlunnik maannakkut sulisoqarput, taakkuli tikisinneqartinnagit nunatta sinnerani sulisussarsioqqaarput, Upernavimmiit sisimiuniillu suliartortoqarneranik kinguneqartumik.

Aamma atuaruk Doris Jakobsenip brugsenimut uparuaanera annertuumik akerlilerneqarpoq

Kujataani suliffeqarfissuaq LNS Greenland nuna tamakkerlugu suliaqartartoq, sulisuni 60-iusut nunaqavissuinnaasut oqaatigaa.

Paasiniaanitta ersersikkaluaraa nunaqavissut sulisoriumaneqarnerusartut, Doris Jakobsenip oqaatigisani allanngortinngilai.

- Soorunami suliffeqarfimmiit suliffeqarfimmut assigiinngitsunik atugassarititaqarput. Kisianni aamma pissusiviusunik takusarpunga, oqaatigeriikkattuut soorlu naapitsisarpunga kalaallit sanasutut ilinniarsimasut suliassaaleqineq pissutigalugu soraarsitat, taamaakkaluartoq takusarpagut tikisitarpassuit sanasutut atorneqartut, Doris Jakobsen oqarpoq.