Doris Jakobsenip brugsenimut uparuaanera annertuumik akerlilerneqarpoq

Siullermik sanaartornermik suliallit oqaatigaat nunaqavissunik sulisoqarnissaq pingaartinneqartartoq aatsaallu pisariaqavitsillugu periarfissatut kingullertut atorneqartartoq.
Maanna aamma Brugseni Doris Jakobsenip oqaatigisai pisiniarfinni aqutsisut avataaneersuunerat eqqunngitsoq qisuariaatigaat.
- Brugsenimi sulisut 500-t missaanniipput tassanngalu 5 procentit missaat tikisitaallutik. Tikisitat tassaanerusarput neqaarniat iffiortulluunniit - taakkunani ilinniarsimasut amigaatigineqarmata, Brugsenimi attaveqaqatigiinnermut sulisoq Irene Jeppson oqarpoq. 
Taamatullu akissuteqarnerminni erseqqissarpaat ilinniartunik ukiumut qulit missaanniittunik brugsenimi naammassisoqartartoq. Saniatigullu ilinniartut ukiumut 30-40 missaanniittut sulisorineqartarlutik.