Suliffeqarfinnut nittartagaqalernissaq Inatsisartut akuersissutigigaat

Siunnersuummut akuersisut 18-iupput, tassa Siumut, Atassut, Demokraatit aamma Partii Naleraq akuersigamik, qulingiluallu IA-meersut akerliullutik taasillutik.

- Suliffeqarfinnut nittartagaq suliffeqarnermi anguniakkanut taaguutilimmut “Suliffeqarneq isumannaatsumut” ilaavoq pingaaruteqartoq, suliffissallu sumiinnerannik qanoq ittuunerannillu tamakkiisumik takunnissinnaanermut iluaqutaallunilu suliffissarsiortut piginnaasaannik paasisaqarnissamut aqqutaassalluni. Taamaattumik nittartakkap pilersinneqarnissaanut Inatsisartut peqataanerat assut nuannaarutigaara, Naalakkersuisuni ilaasortaq Vittus Qujaukitsoq oqarpoq, nangillunilu:

AAMMA ATUARUK Sulisitsisut: Oqartussat akuleruppata kingunerlussinnaavoq

- Suliffissaaleqinerup annikinnerulersikkiartuaarnissaa internetimi nittartakkap pilersinneqarnerani siunertaavoq, aamma Nunatta avataanit Nunatsinnut suliartortut ikinneruleriartornissaat pineqarluni, suliffeqarfiit taamaalillutik ajornannginnerusumik najugaqavissunik sulisussarsiorsinnaalissammata. Aamma sumi suliffissanik inuttaqanngitsunik inuttaliisoqarsinnaanersoq         suliffissarsiuussisarfiit ingerlaannartumik takusinnaalissammassuk.

- Taamaattumik isumaqarpunga nittartagaq suliffeqarneq ataatsimut isigalugu maanna nutarterneqarnerani assut pingaaruteqalissasoq, Vittus Qujaukitsoq allappoq.

AAMMA ATUARUK Suliffissaaleqineq akiorniarlugu innersuussisarfissaq pilersinneqassaaq

Nittartakkap 2015-ip naalernerani atulernissaa naatsorsuutigineqarpoq.