Suliffissaaleqineq akiorniarlugu innersuussisarfissaq pilersinneqassaaq

Naalakkersuisut suliffissaaleqinermik akiuiniarnerminni, qarasaasiakkut nittartakkat atorlugit suliffeqarnermut innersuussisarfimmik, 1,2 millioner koruunit atorlugit pilersitsiniarnerat Inatsisartuni amerlanerussuteqartut isumaqatigisaat ikinnerussuteqarlutik illuatungiliuttut isumaqatiginngilaat.
apriilip 21-at 2015 18:21

 

Suliffissaaleqineq akiorniaraanni suliffissanik toqqaannarnerusumik periusissiortoqartariaqartoq, Inuit Ataqatigiit Inatsisartuni ilaasortaatitaat, Aqqaluaq B. Egede oqarpoq.


- Suliffissaaleqineq akiorniaraanni illuatungeriit tamaasa peqatigalugit toqqaannarnerusumik periusissiortoqartariaqarpoq. Aningaasanut inatsisip isumaqatigiinniutigineqarnerani, Inuit Ataqatigiinniit siullermik innersuusutigaarput, aningaasat 1,2 millioner koruunit innersuussisarfissamut atornagit, Danmarkimut napparsimasut katsorsartikkiartortut ilaqutaasa angalaqqataasalernissaanut aningaasat taakku tamassumunnga atoqqullugit, tassami tamanna ukiumut 1,2 millioner koruunik naleqartarmat.

 

Aqqaluaq B. Egede oqarpoq. Aningaasallu allamut atorneqarnissaannik Inuit Ataqatigiit siunnersuutaat, Inuussutissarsiornermutt Naalakkersuisup, Vittus qujaukitsup ima oqaaseqarfigaa.

 

- Isumaqarpunga tamanna sianilluanngitsuliornerusoq, tassami suliffissaaleqinermi innersuussisarnerup pilersaarutigineqarnerani suliffissaaleqinerup akiorniarneqarneranut qanoq iliuusissatta 16-iusut tamanna ilagiinnarpaa, Vittus Qujaukitsoq oqarpoq.

 

Inuit Ataqatigiinnit suliffissaaleqinerup qaffakkiartuinnarnerata akiorneqarnissaa salliutinneqartoq, Aqqaluaq B. Egede oqarpoq.

 

- Tassa uangut tamanna ujartugarput. Tassami Kalaallit Nunaata Naatsorsueqqissaartarfiata kisitsisaatai naapertorlugit, suliffissaaleqineq ukiuni kingullerni 25-ini qaffakkiartorpoq. Tamassumalu appariartinneqarnissaa pillugu Naalakkersuisunut isumaqatigiinniaraluarpugut. Aamma oqassuunga, Naalakkersuisut allatut isumaqarnerat uangut Inuit Ataqatigiinniit sianilluanngitsutut isiginngilarput, Aqqaluaq B. Egede oqarpoq.

 

Suliffeqarnermut innersuussisarfittaassap qanoq atorneqarnissaa pillugu, Aningaasaqarnermut Naalakkersuisoq ima nassuiaavoq.

 

- Suliffissaaleqisut eqaannerusumik suliffinnut innersuunneqartarnissaat iliuuseqarfissatut siullertut Naalakkersuisunit tikkuarneqarpoq. Suliffeqarnermullu innersuussisarfissaq suliffissaaleqinerup akiorneranut ikorfartueqataasussaalluni.

 

Inuusssutissarsiornermut Naalakkersuisoq, Vittus qujaukitsoq taama oqarpoq.

 

Suliffeqarnermut innersuussisarfissamik Naalakkersuisut pilersaaruteqarnerat nangaanartortaqartoq, Kalaallit Nunanni Sulisitsisut peqatigiiffiannit, GE-mit isumaqarfigineqarpoq. GE-mit aamma oqaatigineqarluni Nunatsinni namminersortutut suliffeqarfinnit tamanna pisariaqartinneqarsimanngitsoq.

 

- Innersuussisarfik kommuninit atorneqarsinnaalluassagunarpoq. Suliffeqarfiit kommuninut saaffiginninnermikkut kommunit namminneerlutik takusinnaassavaat suliffissaaleqisut sorlernik ilinniagaqartut allattugaatigineqarnersut, taamaalillutik suliffeqarfinnik suliassakillisaasinnaallutik.

 

Kalaallit Nunaanni Sulisitsisut peqatigiiffianni inatsiseqarneq pillugu siunnersorti, Karsten Lyberth Klausen taama oqarpoq. Taassuma ilanngullugu aamma oqaatigaa, suliffeqarnermut innersuussisarfimmik sulisitsisut pisariaqartitsinerat tusarsimanagu.

 

Suliffissaaleqinermi innersuussisarfissaq Inatsisartuni ullumi taasissutigineqarmat isumaqataasut aqqaneq marluusut akerliusut quligiluaapput.