Immap assingi: Siumut Socialdemokraatillu 2026 nallertinnagu tunniusseqqusisut
Nunatsinni immap assingi digitaliusut naammassineqarnissaannut pilersaarutit ukiunik arfineq-pingasunik taamaasillutik kingusinnerussapput, immammi assingi siorna 2018-imi naammassineqarnissaat Nunatta Danmarkillu siusinnerusukkut isumaqatigigaluarpaat.
AAMMA ATUARUK Nunatsinni immap assingi digitaliusut 2026-mi naammassineqassasut
Immap assinginik tunniussiffissatut piffissaliussaq naalakkersuisut maannamut isornartorsiunngilaat, Siumulli maanna isornartorsiuilluni:
- Danskit naalakkersuisuisa nalunngikkaluarpaat, immap assiliortiternerit unissasut, immikkut ukkataqartut ikittuararsuusut tusarnaarneqaratik nuussisoqarmat, maannakkullu kinguneraa immap assingi aatsaat 2026-imi naammassineqassammata. Tamanna akuersaaruminaappoq. Siumut sinnerlugu inatsisartunut ilaasortaq Ineqi Kielsen, tusagassiutinut nalunaarummi taama ilaatigut oqarpoq.
Kalaallit Nunaanni immap assinginik digitaliusunik suli peqartoqannginnera ernumanartuusoq, Socialdemokratit Kalaallit Nunaannut tunngasunut oqaaseqartartuata Karin Gaardstedip aviisimut Politikenimut oqaatigereeraalu, Siumut taama isornartorsiuivoq.
AAMMA ATUARUK Isumasioqatigiinneq immap assingi pillugit nutaanik paasisaqarfiunngitsoq
Nunatsinni immap assinginik peqannginerata Kalaallit Nunaata imartaani ajutoornerit amerlinissaannik malitseqarsinnaasoq, Karin Gaardstedip ernummatigaa.
Geodatastyrelsip, immap assinginik isumagisaqartuusup, avataaniit ikiorteqarluni immap assinginik 2026-utinnagu naammassinnissaa pisariaqartoq, Karin Gaardstedip ilaatigut kaammattuutigaa. Piumasaqaat taanna Siumup isumaqatigaa.
Ministeri immap assingisa naammassineqarnissaannut ammasoq, tassungalu atatillugu isummanik tusaaniarniarlunilu periarfissanik ujartuisoq, aamma oqaatigaa.
Nunatsinni immap assingi 34-t Geodatastyrelsip maannamut tunniussimavai. Immap assingi 73-it naammassineqarnissaat pilersaarutaavoq.
AAMMA ATUARUK Saammarsaatissamik imaqarpianngitsumillu isumaqatigiissuteqartut
