Assi: Camilla Dam/KNR

Immap assingi: Saammarsaatissamik imaqarpianngitsumillu isumaqatigiissuteqartut

Nunatsinnut immap assingi qaqugu naammassineqarsinnaassanersut Geodatastyrelsip aatsaat 2018-imi oqaatigisinnaalissavaa. Naalakkersuisut danskillu naalakkersuisui taarsiullugu saammarsaatissamik isumaqatigiissusiorput.

Danmarkimi Geodatastyrelsip Nunatsinnut immap assinginik nutaanik digitaliusunik 73-inik pilersaarutit malillugit 2018-imi tunniussaqartussaagaluarpoq.

Naalakkersuisulli danskillu naalakkersuisuisa isumaqatigiissutaat nutaaq naapertorlugu, immap assingi qaqugu tunniunneqarnissaat aatsaat aappaagu inaarutaasumik isumaqatigiissutigineqassaaq.

Ulloq tunniussiffissaq taamaalillunilu suli nalunarpoq, danskit nukissiuuteqarnermut, pilersuinermut silallu pissusianut ministeriat Lars Chr. Lilleholt KNR-imut tamanna nassuerutigaa:

- Suliassaq aallartittariaqalerparput, taamaammat immap assingi qaqugu naammassivissorneqassanersut 2018-ip ingerlanera aaqqiissutissarsiffigissavarput.

Geodatastyrelsip Københavnimit Aalborgimut 2016-imi nuunneqarmat immap assinginik suliaqartunit 15-iusunit 14-it atorfimminnit soraarsimanerat kinguaattoortoqarneranut pissutaavoq. Kingorna nutaanik atorfinitsitsoqarpoq, ilaatigut sulisut Tuluit Nunaanneersut sisamat, sulisorineqalersulli immap assinginik suliaqarnissamut ilinniartinnissaat ukiut marluk angullugit sivisutigissaaq.

Imaani sillimaniarneq pillugu isumaqatigiissut saammarsaatissaq

Ilassutitut isumaqatigiissummi nutaami Naalakkersuisut danskillu naalakkersuisuisa isumaqatigiissutigaat immap asiliorneqarneranut paasissutissat imarisaat (MSDI) pillugu workshoppertitsisoqassasoq aammalu immap assingi digitaliusut Nunatsinni sunngiffimmi imaani angalasunit atorneqarsinnaanissaannut periarfissat misissorneqassasut.

Aammattaaq Danmarkimi Nukissiuuteqarnermut aqutsisoqarfiup Tele-Postillu imaani ajornartoornermi sillimaniarnermilu radio, aamma Aasiaat Radioanik taaneqartartoq, pillugu suleqatigiinnertik ingerlatiinnarniarlugu aalajangerput. Danskilli ministeriata tamatuma aningaasalersornissaanut periarfissat pillugit Folketingimi oqaloqateqaqqaassaaq.

AAMMA ATUARUK Immap assinginik suliaqarneq 2020-mi aatsaat aallartilluassasoq

Kalaallit Nunaanni imaani sillimaniarnermut maannakkorpiaq qanoq pitsanngorsaataava?

- Tamakku tamarmik - piffissaq ungasinnerusoq eqqarsaatigalugu - imaani sillimaniarnerup isumannaarnissaanut peqataassapput, Lars Chr. Lilleholt taama oqarpoq. 

Attaveqaqatigiinnermut naalakkersuisoq, Erik Jensen, isumaqatigiissut pillugu tusagassiorfinnut nalunaarummi ima oqarpoq:

- Immap assingisa suliarineqarnerinut tunngatillugu ajornartorsiutaasut (...) ajuusaarnarluinnartumik inissisimatilerpaatigut, tamannalu Naalakkersuisut naammaginngilaat. Ministerimik ataatsimeeqateqarnerma kingorna suliassat aalajangersimasumik sinaakkuserlugit suliarineqarnissaat isumalluarfiginerulerpara.

Lilleholt: Ajuusaarnissaq sumut iluaqutaassagami

Danskit ministeriat isumaqanngilaq Geodatastyrelsip Københavnimit nuunneqarnissaanik danskit naalakkersuisuisa aalajangernerat sioqqullugu immap assinginik suliaqarneq Geodatastyrelsimit naalagaaffimmiillu qulakkeerneqarsinnaasimagaluartoq.

- Soorunami qularutissaanngilaq sapinngisaq tamaat qulakkeerniarneqarnissaa. Sulisunilli 15-iusunit 14-it atorfimminnit soraarnissaat ilisimareersinnaanngilara. Taamaammat sapinngisamik pitsaanerpaamik ingerlaqqinnissaq uatsinnut pingaarpoq.

AAMMA ATUARUK Ministerip kinguaattooruteqarneq nassuiaateqarfigissavaa

Peqqissimissutigiviuk? Imaanimi sillimaniarneq matumani pilliutigineqarpoq?

- Tamanna sumulluunniit atorsinnaanngilara. Suliap sapinngisamik pitsaanerpaamik naammassineqarnissaa maanna pineqarpoq. Aamma naalakkersuisutut suleqatiga Erik Jensen ippassaq neriorsorpara immap assingisa naammassineqarnissaat sapinngisarput tamaat sulissutiginiarlutigu.

Taava ajuusaanngilatit? 
- Ajuusaarnissaq sumut iluaqutaassagami. Uannut pingaarneruvoq siumut isigaluta suliassap sapinngisamik pitsaanerpaamik naammassineqarnissaa. Kingumulli qiviaraanni imaassinnaavoq aalajangiinerit arlallit allatut pisimasinnaaneri immaqa eqqarsaatigineqarsinnaagaluarpoq. Imaassinnaavoq aamma kingunerissassai ilisimareersimagaanni allaanerusumik aaqqiissuteqartoqarsimassagaluartoq. Tamakkuli qaangiuteerput. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!