Nunatsinni immap assingi digitaliusut 2026-mi naammassineqassasut
Danmarkimi Geodatastyrelsi pilersaarutit malillugit nunatsinnut immap assinginik digitaliusunik nutaanik 73-inik 2018-ip naanerani tunniussisussaagaluarpoq.
AAMMA ATUARUK Isumasioqatigiinneq immap assingi pillugit nutaanik paasisaqarfiunngitsoq
Immalli assingi 34-iinnaat maannamut naammassineqarsimapput. Geodatastyrelsimmi 2016-imi ilisimatitsissutigaa sulisorineqartut atorfimmit tunuartiternerisa kingunerisaanik immap assinga isumaqatigiissutigineqartutut naammassineqarsinnanngitsut.
Naalagaaffiup suliffeqarfiutaanik Københavnimit Danmarkip sinneranut nussuisoqarnerata kingunerisaanik taama pisoqarpoq.
Taamatullu pisoqarnera Naalakkersuisunit isornartorsiorneqarpoq, naalakkersuisullu nunatsinneersut Danmarkimeersullu arlaleriarlutik ataatsimeeqatigiittaraluartut nutaamik erseqqissumillu pilersaarusiortoqanngilaq.
AAMMA ATUARUK Saammarsaatissamik imaqarpianngitsumillu isumaqatigiissuteqartut
Pilersaarutissarli maanna naammassineqarpoq. Geodatastyrelsi sulisunik nutaanik atorfinitsitsivoq, taakkulu immap assinginik digitaliusunik suliarinninnermut ilinniartinneqarput. Immap assingi nutaat pingasut ukioq manna naammassineqarput, 2021-miillu 2025-imut immap aasingi arfillinnit naammassineqartassapput immallu assingi kingulliit pingasut 2026-mi naammassineqassallutik.
Suliffeqarfimmit sulisunik suliunnaartoqaqqinnginnissaa tunngavigalugu pilersaarusiortoqartoq, Geodatastyrelsi taama ilisimatitsivoq.
Immap assinginik ingerlaavartumik suliaqarnerup eqqartorniarlugu Geodatastyrelsimeersut ukiumut ataasiarlutik naapeqatigiittassasut aamma ilisimatitsissutigineqarpoq.
AAMMA ATUARUK Nunap assingi nutaat suliarineqalersut
AAMMA ATUARUK Immap assinginik suliaqarneq unittooqqaffiusoq
