Aki-Matilda Høegh-Damip kalaallisut oqalugiarnerata aappaaguani: Siumut Folketingimi attaveqaatitigut toqqaannartumik oqalutseqassasoq
Nunanut allanut sianersinnaavugut, nittartakkakkut attaveqaatitigut toqqaannartumik immiussisinnaavugut avataarsuaniittunillu attaveqateqarsinnaalluta.
Taamaammat nunarsuarmi sumiilluunniit sumut allamut soorunami toqqaannartumik oqalutseqartoqarsinnaavoq.
Kim Ludvigsen tassa taama eqqarsartaaseqarpoq. Taassuma suliffeqarfik nittartakkakkut attaveqaatitigut app´i atorlugu toqqaannartumik oqalutseqartitsivik Interprefy 2014-imi pilersippaa.
- Atuaasup, oqalutsip atuisulluunniit app´erput iserasuarfigalugu atorsinnaavaat. App´itta oqalutsimit nammineq aqunneqarsinnaanera immikkuullarissutigaa. Tassa oqalutsit nunarsuarmi sumiilluunniit atorsinnaavaat, taanna KNR-imut oqarpoq.
Kim Ludvigsen qallunaajuvoq, suliffeqarfiuteqarfiminili Schweizimi najugaqarluni. Suliffeqarfiutaata oqalutsit attaveqarfigisai 5000-t missaanniittut nunanit tamalaaneersuupput, aamma nunani tamalaani timersoqatigiiffiit kattuffii arlallit aammali Naalagaaffiit Peqatigiit EU-Kommissionilu sullitaanut ilaapput.
Suliffeqarfiutaatalu Danmarkip ministeriunera naalagaaffeqatigiinneq pillugu Folketingimi tallimanngornermi ukiumoortumik nalunaaruteqarpat qallunaatuumiit kalaallisuumut toqqaannartumik oqalutseqartitsissaaq.
Nittartakkakkut attaveqaatitigut app´ertik atorlugu taamaaliussaaq. Tassa nunatsinniit oqaluttaasussap Folketingimi oqaluttut app´ikkut tassuuna toqqaannartumik tusarnaarsinnaagai app´ikkullu aamma tassuuna toqqaannartumik oqaluttaasoq Facebookiminni toqqaannartumik aamma tusarnaarneqarsinnaassasoq, Siumup allattoqarfianeersoq KNR-imut uppernarsaavoq.
Oqalutsit Folketingip ataatsimiittarfianeeqqissaartariaqartanngitsut
Tassa Aki-Matilda Høegh-Damip uitsatigineqaqisumik kalaallisut Folketingimi oqalunneraniit ukioq ataaseq qaangiussimalersorlu taamaaliussapput. Aki-Matilda Høegh-Damilli taamaaliornera kalaallisut savalimmiusullu oqaluttoqarsinnaanera Folketingip siulittaasoqarfiata siorna septembarimi akuersineranik kinguneqarpoq.
Folketingip nittartagaata ilaa kalaallisut savalimmiusullu aamma nutserneqaleruttorpoq.
Folketingimili toqqaannartumik oqaluttaasarfeeraliortitsinissaq akisuallaarpoq. Folketingimmi ataatsimiittarfitoqaani sanaqqiititsinissaq 40 millionit koruunit missaannik akeqassangatikkitsik, Søren Gade septembarimi oqarpoq.
Kim Ludvigsenip issuagaq taanna atuaramiuk tupigutsappoq.
- Ileqimisaartuutigalunga ima eqqarsarpunga: ’Arraa uagut ajornartorsiut taanna akikinnerujussuarmik aaqqissinnaavarput'. Oqaluttaasussammi Folketingip ataatsimiittarfianeeqqissaartariaqanngillat. Sumiilluunniimmi oqaluttaasinnaapput, Kim Ludvigsen oqarpoq.
- Taama oqarneq teknikkikkut atortorissaarutinik inerisaasoqarsimaneranik ilisimaanneruvoq, taanna oqarpoq.
Folketingi aaqqiissuteqarpoq, tassa partiit sisamat Atlantikup Avannaaneersut oqalutseqarnermut atugassaminnik tamarmik immikkut qaammammut 69.211 koruuninik tapiissutisisalerput. Partiit nammineerlutik oqalutsissarsiortassallutillu allagaatiminnik nutserisitsisassapput, aamma qaqugukkut sunillu taamaaliortitsisassanerlutik nammineerlutik aalajangertassallugu.
Interprefyp app´ia Folketingip højtaleriinut tassaniluunniit ilaasortat siutequtaannut tusarnaarutigisartagaannut atassusersinnaaneritsik Kim Ludvigsen aperigatsinni ima akivoq:
- Soorunami! App´erput Folketingip højtaleriinut attaveqaatinulluunniit sorlernulluunniit atassuserneqarsinnaavoq.
Folketingip oqalutseqarnermut atortorissaarutai tallimanngornermi oqallinnissami toqqaannartumik oqalutseqarnerminni attaveqaatitigut app´-imut atugassaminnut atassusersinnaaneritsik apeqqutigalugu, Aki-Matilda Høegh-Damip Folketingip siulittaasuanut Søren Gademut (V) allagai aamma takuagut.
Suliffeqarfiutimi app´ianik Folketingi atuisunngussappat qanoq akeqassanersoq oqaatigisinnaanngikkini, Interprefymik piginnittoq oqarpoq. Taamaaligunili ukiumut akiliutigisartagassai sanaqqiisitsinissanerinnarmut aningaasartuutissaninngarnit, tassa 40 millionit koruunininngarnit ikinnerussaqisut erseqqissaatigaa.
- Oqaluttaanissat qanoq akulikitsigisassanersut qanorlu nutsigassaqartigisassanersoq apeqqutaassaaq, millionilli qulikkaat angunagit akeqartussaassaaq, Kim Ludvigsen oqarpoq.
Oqalutsit naammassisaqarnerulersinnaasut
Folketingimi nittartakkakkut attaveqaatitigut oqalutseqartalernissamut tamatuma saniatigut allamik pissutissaqarluartoq, Kim Ludvigsen aamma oqarpoq. Kalaallisummi oqaasilinnik aamma oqalutsissaalatsisoqartartoq, Søren Gade ukiarmi oqaloqatigigatsinni oqarpoq.
- Oqalutsit app´erput atorlugu assersuutigalugu Folketingimi ullaakkut oqaluttaariarlutik Nuummi inuussutissarsiornermik nittarsaassisunut oqaluttaasinnaapput allarluinnarmilu unnukkut aamma taamaaliorlutik. Oqalutsit naammasisaqarnerusalernissaat qularnaarsinnaavarput.
Interprefyp app´-ertik Siumukkullu Aki-Matilda Høegh-Damip siorna novembarimi oqalunnerani misilittaramikku nunatsinniittumik oqalutseqarput.
- Tamanut ammasuunngitsumi nalinginnaasumilli misilittarparput. Ilimagisatsitullu iluatsippoq, Kim Ludvigsen oqarpoq.
Taamaammat Interprefy naalagaaffeqatigiinneq pillugu Folketingimi tallimanngornermi oqallinnermi oqalutseqartitsisussatut Siumumit iminneqarpoq.
Folketingip siulittaasoqarfianeersumik tamanna pillugu oqaloqateqarniaraluarpugut, oqaluttuamilli uuminnga saqqummiitinnata pisinnaasimanani.
