Nioqqutissanik ilitsiviit sikorsuaqarnera pissutigalugu imaqanngitsut
Nunatta kujataani nunaqarfimmi Alluitsup Paani Pilersuisumi nioqqutissaataasiviit piffissami sivitsortumi imaqanngillat.
Nunaqarfimmiulu Lars Poulsen aperigaanni sivisuumik imaqarsimanngillat:
-Taanna kipiluttunarpoq, pisiassaqarnani pisiniarfimmi, taanna oqarpoq.
Pilersuisumi iffiorfeqanngilaq, nerisunillu aamma iffiugaqarani. Nillataartitsiviit aamma imaarulluinnalerput.
Naatitanillu nioqqutissat aamma qiviaraanni taakku nunguissimapput. Naatitat, iipilit, banaanit allallu pisiassaanngillat. Aamma naatsiiaqaranilu uanitsoqanngilaq. Qerititsivinnilu qerisut aamma nunguliivillutik.
Lars Poulsenip pisiniarfimmi nioqqutissaqaleqqinnissaat pingaaruteqarnerarpaa.
-Erininarsiinarpoq, qaammatit marluk sinneqalinngikkunik nioqqutissanik pajunneqannginnatta, tamanna kipiluttunarsivoq.
Sikorsuit aporfiusut
Royal Arctic Linep umiarsuaataa Arpaarti Arctica nunatta kujataani pajuttartuusoq nioqqutissanik arlaleriarluni pajunniartarsimagaluarpoq, sikorsuaqarpallaarnerali pissutigalugu Qaqortumut uteqqiinnartariaqartarsimasoq, Royal Arctic Line allappoq.
Nunatta kujataani sikorsuaqarpallaarnera pissutaalluni nunaqarfiliartaat Arpaarti Arctica Qaqortup Nanortallillu akornanni nunaqarfinnut suli tikissinnaangikkallarpoq. Sikorsuit illuakaatiteriarniariartut Arpaarti Arctica nunaqarfinnut pajuttuilluni angalajumaartoq RAL paasissutissiivoq.
Angallat alla ullumikkut sikorsuit akunnisiorlugit Alluitsup paa ippassaq avaqquppaa, taamaattumik piaartumik pajunneqarsinnaasallutik Lars Poulsenip neriuutigaa.
- Nioqqutissanik piaartumik pajunneqarsinnaassalluta neriuutigaara.
Kujataani nunaqarfinut nioqqutissanik pajuttaat ullumi maajip aallaqqaataani Alluitsup Paanut nioqqutissanik pajulluni misileeqissasoq Royal Arctic Linemiit pilersaarutaavoq.