Professori: Sioorasaarineq nunat inoqqaavisa allat akornanni aalassatsitsisinnaasoq

Naalagaaffiit pissusiinik ilisimatusarnermi Tromsøp Universitetiani professori, issittumullu tunngatillugu politikkimik ilisimasalik, Rasmus Gjedssø Bertelsen, Politiken naapertorlugu, taama naliliivoq.

Nunanut allanut tunngasunut naalakkersuisup Vittus Qujaukitsup danskit nunanut allanut tunngasunut ministeriannut allagaqarluni Danmark amerikamiut sakkutooqarfigisimasaanni Camp Centurymi avatangiisitigut ajornartorsiutinut aaqqiissuteqanngippat Naalagaaffiit Peqatigiinnut saaffiginnissutiginiarlugu sioorasaarutigaa.

Aamma atuaruk Camp Century Naalagaaffiit Peqatigiinnut suliassanngortinniarlugu nunatta sioorasaarutigigaa

Suliaq nunatta nunat tamalaat eqqartuussiviannut Haagimiittumut suliassanngortissinnaanngilaa, nunarput naalagaaffittut namminersortutut inissisimanngimmat. Nunalli inoqqaavisa allat akornanni akerliunermik pilersitsisinnaavoq avatangiisillu pillugit akisussaaffik pillugu nalunaaruteqarnermik kinguneqarluni, Rasmus Gjedssø Bertelsen taama naliliivoq.

USA-p saliinermik isumaginnittuunnginnissaa naatsorsuutigineqarpoq, tamanna nunarsuarmi sumiiffinni allani amerikamiut sakkutooqarfiini saliinissamik piumasaqaateqartoqarnissaanut ammaassisinnaassammat.

Danskit nunanut allanut tunngasunut ministeriata Kristian Jensenip Vittus Qujaukitsoq ullumi ataatsimeeqatigissavaa, tamatumanilu Camp Centurymi avatangiisitigut mingutsitsineq oqaluuserineqassaaq.

Aamma atuaruk Qujaukitsup danskit isornartorsiorpai