Sanaartugassinneqartartoq aneerasaartarfik pillugu eqqartuunneqaqqittoq
Nukappiarannguaq nakkarnermini ikilingaatsiarpoq ajunaanngilarli. Aneerasaartarfiup illullu iigaata akornaniittoq putoq 16,6 centimeterisoq nukappiaqqap nakkarpoq. Tamanna illuliornermi malittarisassanik unioqqutitsineruvoq, nunattalu eqqartuussisuuneqarfiata sanaartugassanik suliassinneqartartoq illuliortuusoq tamatumani pisuutillugu novembarip 30-ani eqqartuuppaa, unnerluussisussaatitaasut tusagassiutinut allapput.
Sanaartugassanik suliassinneqartartup nukappiaqqap angajoqqaavisa takunnittuusullu allat nassuaaneratut, nukappiaraq ilumut illup igartaata aneerasaartarfiullu akornatigut nakkarnera ilumoornersoq eqqartuussivimmi apeqqutiginiarsaraa.
Nukappiaraq taamanikkut ataatsimik ukioqartoq, maajip 31-at 2013-imi Tuapannguit 5-imi Nuummiittumit quleriiaat arfinilissaanit nakkarpoq.
Nunatsinni Eqqartuussiviit juuni 2016-imi eqqartuussut nalunaarutigaa. Sanaartugassanik suliassinneqartartoq illuillu piginnittoq Illuut A/S tamarmik 45.000 koruuninik akigassinneqassasut eqqartuussummi aalajangerneqarpoq.
Sanaartugassanilli suliassinneqartartup nassuiaataa nunatta eqqartuussisuuneqarfiata itigartitsissutigaa, tamannalu unnerluussisussaatitaasup, Liselotte Bøhmip nuannaarutigaa.
- Nunatta Eqqartuussisuuneqarfiata nukappiarannguaq ilumut aneerasaartarfimmiit nakkartoq aalajangiusimavaa, tamannalu aneerasaartarfimmi sillimanissamut illersorneqarsinnaannginneratigut pisinnaavoq, Liselotte Bøhm oqarpoq.
Illorsuarmik taamanikkut piginnittuusoq Illuut A/S eqqartuussivimmi suliami aamma unnerluutigineqaraluarpoq, taannali maanna pinngitsuutinneqarpoq, tassa nunatta eqqartuussisuuneqarfiata piginnittup aneerasaartarfiup amigaateqarneranik ilisimasaqarnissaanut uppernarsaatissaqannginnerarpaa. Taamaalilluni nunatsinni eqqartuussiviup sanaartugassanik suliassinneqartartup illuutilillu tamarmik akiligassinneqarnissaanik 2016-imi eqqartuussinermi aalajangiinera atornagu illuutilik sanaartugassanik suliassinneqartartutulli 45.000 koruuninik akiligassinneqanngillaq.
AAMMA ATUARUK Nukappiaqqap ataatsimik ukiullip aneerasaartarfimmit nakkarnera pillugu eqqartuussineq inerneqartoq
AAMMA ATUARUK Sermersooq: Aneerasaartarfiup akunnera sanaartortitsisup akisussaaffigaa
AAMMA ATUARUK Aneerasaartarfimmit nakkartoqarnera pinngitsoortinneqarsimasinnaagaluarpoq