Aneerasaartarfimmit nakkartoqarnera pinngitsoortinneqarsimasinnaagaluarpoq

Carl Sværdip, Tuapannguani inissiarsuarni najugaqarsimasup, aneerasaartarfimmi sananeqarnera akornuteqartoq 2011-mi ukiakkut paasivaa.

- Ataatama, sanasuusup, pulaartilluni paasivaa ungaluusat illullu iigaata akunnerat annertuallaartoq.

Nukappiaraq akunneratigut tassuuna nakkarsimanersoq suli paasineqanngilaq, taamatulli pisoqarsimanissaa maannakkut ilimanarnerpaagallarpoq.

Carl Sværd nassuiaavoq illup iigaata ungaluusallu akunnerat 16 centimeteriusoq, sanaartornermilu malittarisassat malillugit annerpaamik 12 centimeterinik akunneqaqqusaasoq.

Carl Sværdip INI A/S e-mailikkut erngerluni attaveqarfigaa, inissiaatileqatigiiffik kukkusoqarsimaneranik ilisimatillugu.

- Marlunnik ukiulimmik qitornaqarpugut, tassanilu najugaqarallaratta qitornatta allallu qitornaasa aneerasaartarfimmit nakkarsinnaanerat assut ernumagaarput.

Carl Sværd suliap isumagineqarnissaanik INI A/S-imit akineqarpoq. Inissiaatileqatigiiffilli tutsaqanngiinnarmat nammineerluni iliuuseqarniarluni aalajangerpoq.

Inissiarsuarmi najugaqartut allat kukkusumik sanasoqarsimaneranik ilisimatinniarlugit paarlerni allagartamik nivinngaavoq, meeqqallu mikisut illup iigaata aneerasaartarfiullu ungaluisa akunneratigut nakkarsinnaanerat mianersoqqussutigalugu.

Carl Sværd INI A/S-imit 2012-imi aatsaat tugaqaqqippoq. Inissiaatileqatigiiffik illuliornermi konstruktørimik aneerasaartarfinnik misissuiartortitsiartorniarluni aalajangersimavoq, taassumalu inerniliinera aamma taamaappoq. Illup iigaata assiaqutillu akunnerat annertuallaaqaaq.

Kukkusumik sanasoqarsimanera INI A/S-ip ilisimagaluaraa, suliami iliuuseqartoqaqqissimanngilaq. Taamaammat Carl Sværd 2012-imi upernaakkut allagartamik inissiarsuup iluani nivinngaaqqippoq, najuqaqatiminik mianersoqqussuteqarluni.

Allagartaliineratigut INI A/S qisuariaateqarpoq. Carl Sværd attaveqarfigineqarpoq, ajornartorsiutillu qanoq ilillugu aaqqiivigineqarsinnaanera misissornerarlugu oqaluttuunneqarluni.

Carl Sværdillu ernumagisimasaa tallimanngornermi maajip 31-iani 2013-imi pivoq. Nukappiaraq 14-inik qaammatilik Tuapannguani inissiarsuit ilaanni quleriit arferngannit nakkarpoq annertuumillu aqqunarluni.

- Aatsaat taama ilungersunartigisumik ajutoortoqarneratigut qisuariartoqarnera kusanaalluinnarpoq. Kukkusimapput, aammalu kukkussutertik aaqqiissuteqarfigisimanngilaat. Iliuuseqarsimanngilluinnarnerat ilungersunarluinnartuuvoq, Carl Sværd oqarpoq.

Elias Inûsugtup, nukappiaqqamut 14-inik qaammatilimmut ataataasup, Namminersorlutik Oqartussat Tuapannguani inissiarsuarnik sanaartortoqarneranut atatillugu isumannaallisaanermi piumasaqaatinik sanioqqutitsisimasutut politiinut nalunaarutigisimavai.

Nukappiaqqap nakkarnermini niaqqumi saarnga innarlerpaa, najungasuni arfinillit napillugit, niumi aappaa napillugu puammilu aappaa innarlerlugu. Nukappiaraq annertuumik ajoqusersimavoq, paasissutissallu pissarsiarisagut naapertorlugit inuunera maanna ulorianartorsiorunnaarsimavoq.