Royal Greenlandip KNAPK paasitippaa
Allagaq tunisasivinnut nassiussaq, KNR-ip maana pigilerpaa.
Naalakkersuisoqarfimmi pisortaq, Jørgen Isak Olsen, radioaviisimut ippassaq sisamanngornermi oqaraluarpoq, KNAPK allakkamik nassinneqarsimasut, oqaatigalugulu nassiussiffigisartagaannut aalajangersimasunut KNAPK ilaasoq.
Kisiannili nassiussinermi uani KNAPK avaqqunneqarsimavoq.
KNAPK, KNR-imut uppernarsaamik nassiusivoq, allakkami takuneqarsinnaalluni kapisilinnik tunisisoqarsinnaassanngitsoq, Royal Greenlandip KNAPK paasitikkaa.
Aamma atuaruk Siunnersuisoqatigiit tunitsivinni kapisileqaleqqinnissaanik kissaateqarput
- Asasakka tamassi. Naalakkersuisut aalajangernerat paasisimanerissi isumannaarniarlugu allappunga, ukioq manna kapisilinnik tulaassassanik pisassiisoqanngimmat. Naalakkersuisoqarfimmiit allakkami naatsumi, KNR-imit kalaallisuunngortitasinni taama allassimavoq. allagaq taanna Royal Greenlandimut aalisakkanillu tunisassortunut allanut nassiussaasoq, KNAPK-mullu Royal Greenlandimit ingerlateqqinneqarsimalluni.
Aamma atuaruk Jørgen Isak Olsen: Naalakkersuisut suna tunngavigineraat nalunarpoq
Kapisilinnik tunisassiorfinnut tunisisoqannginnissaannik naalakkersuisut aalajanngernerminnut suna tunngavigineraat, KNAPK suli paasitinneqarsimanngitsoq, KNAPK-p pisortaata tullia Tønnes Berthelsen oqarpoq.
Aalisarnermut naalakkersuisoq Karl-Kristian Kruse aamma aalisarnermut naalakkersuisoqarfimmi pisortaq Jørgen Isak Olsen oqaaseqartinniaraluaratsigu ullup qeqqata siorna iluatsissimanngilarli.
