RAL-ip kukkuluttorneranik Pilersuisoq eqqugaaqqasoq

Umiarsuaatileqatigiiffiup, Namminersorlutik Oqartussanit pigineqartup, teknikkikkut atortorissaarutinik nutaanik atuutilertitsiniarnini qaammatini arlalinni ajornartorsiutigisorujussuuaa.

Containerit 88-it assartorneqarnissaannut atatillugu juunip naalernerata juulillu aallartinnerata akornanni kukkussuteqartut, RAL-ip kisitsisaataasa takutippaat.

Pilersuisullu pisiniarfiisa pilersorneqarnissaannut tamanna kingunerlutsitsisorujussuusoq, KNI-p nioqqutissanik piniartarnermut logistikkimullu pisortaata Kurt Lauritsenip oqaatigaa.

AAMMA ATUARUK RAL-ip assartuinini ajornartorsiutigigaa

- Umiarsuarnik ukioreernerani aallartitsinitta nalaani taama pisoqarpoq, nioqqutissallu kingusinaarnatik apuunneqannginnerat, qaqugulu apuunneqassanersut pillugu nalornissuteqarnerput ajornartorsiortitsipput, Kurt Lauritsen oqarpoq.

Tamannalu pisiniartunit malugineqarsinnaasoq, taanna oqarpoq.

- Pisiniartut pisiniarfinni nioqqutissanik sungiusimasaannik ingammillu niooqutissanik nutaanik, umiarsuit tikikkaangata qilanaarineqartartunik tuniniaasoqarneq ajornera malugaat. Nioqqutissallu nutaat tuniniarneqanngikkaangata, taava pisinniartut pakatsisarput, sulisorisatsinnullu naammagittaalliortarlutik, Kurt Lauritsen oqarpoq.

Ingammik nioqqutissat nutaat kinguaattoorneri Pilersuisumut aningaasatigut kingunerlutsitsisoq, nioqqutissallu amigaataanerat pillugu nassuiaaqattaartariaqartarlutik, Kurt Lauritsen oqarpoq.

AAMMA ATUARUK RAL-imi inniminniinermi sullississut nutaaq Brugsenimut ajornartorsiutaasoq

Nunatta annersaa eqqorneqaraluarluni kukkunerit kinguneri ingammik avannaani malugineqarsinnaasut Lauritsenip oqaatigaa.

- Qeqertarsuarmi eqqaanilu taavalu avannamut Uummannami Upernavimmilu eqqaannilu, sikup killiffiginikuusaanut umiarsuit siulliit ukioq manna assartuissapput, Kurt Lauritsen oqarpoq.

Containerit sapaatit akunnermi 27-imi usineqanngitsoortuni 55-iusuni affangajaat Aasiannit usineqanngitsoorsimasut RAL-ip kisitsisaataasa takutippaat. 

Containerit apuunngitsoortarnerat aamma Pisiffimmut kingunerlutsitsivoq. Containerit kingusinaarluni apuunneqaraangamik pisiassat qaangiuttooreersut igiinnarneqartariaqartartut Pisiffimmi nioqqutissanik piniartartoq Niels Erik Pedersen oqarpoq.

- Pisisartugut pakatsisarput. Pingaartumik nioqqutissat nutaat, naatitat nillataartullu, taakkua tikinngikkaangata piginngikkaangatsigilluunniit pisisartutta amigaateqartarnerat kingunerisarpaa, Niels Erik Pedersen taama oqarpoq.

AAMMA ATUARUK Pisisartut RAL isornartorsioraat

Kukkunerit sapaatit akunnerit tallimat arfineq-marlullu akornanni ingerlanerini iluarsiivigineqarsimanissaat naatsorsuutigineqartoq, RAL-ip nittartagaani nalunaarummi allaaserineqarpoq.

Taamalu pilersaarnerup piviusunngortinneqarnissaa Kurt Lauritsenip neriuutigaa, taamaattoqanngippammi ajornartorsiortitsissasoq, taanna oqarpoq.

- Toqqissisimanarpallaanngilaq. Apriilimili maajimilu kukkusoqartalerpoq, tamatigullu oqartoqartarpoq, qaammatip tulliani piariissallutik. Aamma juunimi oqarfigaatigut, juulimi nalinginnaasumik ingerlatsisoqaqqilerumaartoq. Sapaatillu akunneri tallimat arfineq-marlulluunniit qaangiuppata, taava umiarsuit pisinniarfeqarfitta ilaannut kingullermik assartuisarfiannut tikingajalissaagut. Nioqqutissallu innimineriikkatta taakkununnga apuunneqarnissaat tatigisinnaanngikkutsigu ajornartorsiuteqarpugut, Kurt Lauritsen oqarpoq.