RAL-imi inniminniinermi sullississut nutaaq Brugsenimut ajornartorsiutaasoq

Tamannalu Kalaallit Nunaanni Brugsenip maluginngitsuunngilaa, pisiassammi apuuffissaminnut assartorneqarneq ajorput.

- Assersuutigalugu containeri nerisassanik imalik Qaqortuliaanneqartussaagaluartoq, suli Nuummiippoq. Containeri Maniitsuliaanneqartussaagaluartoq aamma uninngaannarpoq, Brugseni tusagassiuutinut nalunaarummi allappoq.

Pisiassallu aalajangersimasut illoqarfippassuarnut apuutinngitsoorput.

- Banaanit Paamiunut, Narsamut, Qaqortumut Nanortalimmullu assartorneqartussaagaluarlutik Nuummi niuneqarsimapput. Tamakkuuppullu suliffeqarfitta pisiniartartuttalu misigisarsimasaata ilamininngui, Brugseni allappoq.

Inniminiinermi qarasaasiakkut sullississutip nutaap atuuttussanngortinniarnera ajornakusooqqaassasoq, Royal Arctic Linep aallaqqaammulli erseqqissaatigereerpaa.

- Piareersarluarnikuugaluaqaluta, soorunami suut tamarmik nutaat erngertumik 100 procentimik ingerlaneq ajormata arlaatigut suliassaqalaarumaarpugut, Royal Arctic Line martsimi allappoq.

Qaammatilli arlallit ingerlareeraluartut suli aaqqissimanngilaq, tamannalu pisisartunut sunniuteqarnerluppoq.

- Ajornartorsiut utoqqatsissutigaarput, neriuppugullu erniinnaq iliuuseqartoqassasoq, pissusissamisullu ingerlaqqilissalluni, Brugseni naggasiivoq.