Qaasuitsumi killissaleriikkamik atorfinitsitsisoqarniarpoq

- Aamma uagut kommunini allanisulli isumaginninnermi siunnersortinik ilinniarsimasunik atorfinitsitsiniartarneq unammillernartoqarteqaarput, isumaginninnikkut pisortaq Henrik Sóloy oqarpoq; 

Aamma atuaruk Akissarsiat amerlanerusut Kommune Kujallermit piumasarineqartut

- Tamannalu politikerinit eqqumaffigineqarmat, isumaginninnermut siunnersortinik ilinniarsimasunik ukiumut killissaleriikkamik atorfinitsitsisalerniarnerput aningaasaqarnermut ataatimiititaliatta aasaq manna akuersissutigaat.

Kommune Kujalliup Kommuneqarfik Sermersuullu isumaginninnermi sulisoqarnerulernissaq anguniarlugu isumaqatigiissutit aqqutigalugit ajunngitsorsiassanik neqerooruteqarsinnaalernissaq anguniarlugu inatsimmik allannguinissaq pillugu aningaasaqarnermut naalakkersuisoqarfimmut pisortatigoortumik saaffiginnissuteqarput.

Arlalinnik qinnuteqartoqartoq

Qaasuitsup Kommuniatali killissaleriikkamik atorfinitsitsisalerniarpoq, taamaasiornikkut akissarsianik amerlanerusunik ajunngitsorsiassanillu siunnersortinut neqerooruteqartalerniarluni. 

Ajunngitsorsiassat ukiuni pingasuni sulereeraanni nalinginnaasumik 100.000 koruuniusarput.

Tamannalu iluatsilereerpoq.

- Sulisussanik piukkunnartunik marlunnik qinnuteqartoqarpoq. Tamannalu ajunngeqaaq. Piginnaanilinnik qinnuteqartoqallattaareerpoq, kisianni isumaginninnermut siunnersortitut ilinniarsimasuunngitsunik.

Ajortumik ingerlalersinnaasut

Killissaleriikkamilli atorfinitsitsisarneq aarlerinartortaqarpoq. Kommunimmi aningaasarsiagissaartitsiniutilersinnaapput, taamaammallu Qaasuitsup Kommuniata iliuusaa siunissami ungasinnerusumi atasinnaanngitsoq, isumaginninnermi pisortaq isumaqarpoq.

- Isumaqarpunga kommunit tamarmik oqaloqatigiittariaqartut, suliassarlu una qanoq pitsanerpaamik  suliarisinnaanerlugu oqaloqatigiissutigalugu, Henrik Sóloy oqarpoq, nangillunilu;

Aamma atuaruk Isumaginninnikkut siunnersortit utaqqisinnaanngikkaat

Aamma atuaruk Kommune Kujalleq isumaginninnermi pisortaqaleqqittoq

- Tassami tamatta imikkut aningaasarsianik qaffaasaqattaalerutta isumaginninnermilu siunnersortinik immitsinnut arsaaqattaarluta, ajortumik ingerlalissaagut. Taamannallu ingerlaneq attanneqarsinnaanngilaq, Qaasuitsup Kommuniani isumaginninnikkut pisortaq Henrik Sóloy oqarpoq.

Taanna isumaqarpoq, isumaginninnermi siunnersortit aningaasarsiagissaarnerusariaqartut.

Nunaqarfinni iliniartitsisussaqaqqullugu kommuni piumaneqarluartunik killissaleriikkamik piffissami sivisujaami atorfinitsitsisareerpoq. Taamaaliornerlu iluaqutaaqisoq, Henrik Sóloy oqarpoq.