Qaanaami meeqqat aasarsioqatigineqalersut

Qaanaami meeqqat inuusuttullu nunat assigiinngitsuneersut ilagalugit Qaanaami aasarsiulerput.

Qaanaami meeraqarpoq, angalaneq akisuallaarmat pisariuallaarmallu, aasaanerani atuanngiffeqarnerminni nunanut allanut angalaneq ajortunik.

Taamaammat meeqqat inuusuttullu aasaanerani susassaqartikkusullugit sammisassarpassuaqarfiusumik aasarsioqatigineqassasut, Peqatigiiffik Kalaallit Meerartaat tusagassiuutinut nalunaaruteqarpoq.

Kulturit allarluinnaat

Namminneq kajumissutsiminnik Spaniamit, Mexicomit, Finlandimit, Ukrainemit, Korea Kujallermit Tuluit Nunaanniillu suleqataasut katillugit 17-it juulip ulluisa 17-aniit sapaatit akunnerini sisamani sammisaqartitsissapput. 

Camp Q, Qaanaaq 2014

 

Taakkua timersuutit, soorlu nukkassarnerit, oqilaniunnerit aalaasillu assigiinngitsut, atorlugit ilusilersuisitsinikkullu oqaatsinik ilinniartitsissapput eqqaamasinnaanermillu sungiusaassallutik.

Taassuma saniatigut nunat assigiinngitsut piorsarsimassusaannik, nerisassiaannik nipilersugaannillu ilisarititsissapput taavalu aamma Qaanaap avataani ilinniariaqqiffissat suliffissallu saqqummiunneqassallutik.

Nunarsuaq ilisaritillugu

- Piffissami sivikikkaluartumi aallussilluta sammisassaqartitsigaangatta piffissaq ungasissoq isigalugu allanngueqataasarpugut. Meeqqat isorliunerusuni najugaqartut paasilertarpaat nunarsuarput periarfissaqaqisoq, Peqatigiiffik Kalaallit Meerartaat allappoq, nangillunilu: 

- Aamma takusinnaasarparput meeqqat oqaatsinik assigiinngitsunik pikkorinnerulertartut nalunngilarpullu oqaatsitigut pisinnaasaqarneq ilinniaqqinnissamik misigisassarsiornissamillu periarfissiisartoq, Peqatigiiffik Kalaallit Meerartaat allappoq.

Peqatigiiffik Kalaallit Meerartaat nunatsinni sisamassaat aasaanerani sammisaqartitsivoq, Qaanaamilu pisussap assinganik 2014-imi aasarsioqatiginnilluni.

Peqatigiiffik Kalaallit Meerartaat Danmarkimilu Mellemfolkeligt Samvirke aaqqissuussipput. Aningaasaateqarfiit suliffeqarfiillu assigiinngitsut tapiinerisigut aaqqissuussaq piviusunngorpoq. Amerikap illersornissaq pillugu oqartussaasuisa namminneq kajumissutsiminnik suleqataasussat Københavnimiit Pituffimmut angalanerat akilerpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!