Tusagassioriaatsimik ilisimatooq: Professorip eqqartuussivilersuunneqarnera qaqutigoortuuvoq

Professorip tusagassiuutinut oqaaseqarnera aallaavigalugu eqqartuussivilersuussineq qaqutigoortuusoq, tusagassioriaatsimik ilisimatooq oqarpoq.

Kommuneqarfik Sermersuup professorimik Siorarsiorfik pillugu oqaaseqartumik eqqartuussivilersuussiniarnera aamma sakkortusoq, tusagassiornermik ilisimatusarfimmi immikkoortortaqarfimmi pisortaq isumaqarpoq. 

- Taamatut sassaqqusilluni periuseqarneq sakkortuvoq, pisortaq Naja Paulsen oqarpoq.

AAMMA ATUARUK Professori Siorarsiorfik pillugu oqaaseqartoq Sermersuup eqqartuussivilersuukkaa

Kommuneqarfik Sermersuup Roskilde Universitetimi professori Ole Helby Petersen Nuummi Siorarsiorfik pillugu apersorneqarluni isummernera iluarinagu eqqartuussivilersuukkaa, aviisi Sermitsiaq.AG marlunngornermi allappoq.

- Allanik aningaasaliisoqarnera kommunip sanaartornissamut aningaasaliissutaani inissaqartitsilerlunilu akissaqartitsilernissaanik tunngavilersuineq eqqunngitsuuvoq, professori aviisimut ilaatigut oqarpoq.

Ilisimatuut isummersorsinnaasut

Taamali eqqartuussivilersuussiniarneq nalinginnaanngeqisoq, immikkut ilisimasalik oqarpoq.

- Kommunip aalajangiisartuisa immikkut ilisimasallit allallumi kommunimut isornartorsiuisullu eqqartuussivilersuuttassagunikkit ulapissaqaat, tusagassioriaatsimik ilisimatooq Roskilde Universitetimeersoq Mads Kæmsgaard Eberholst oqarpoq.

Professorip tusagassiuutilerisut saqqummiussaat najoqqutaralugit isummersornera pissusissamisoortoq, taanna isumaqarpoq:

- Ilisimatuut saqqummiussat najoqqutaralugit nalilersuinerat nalinginnaalluinnarpoq. Saqqummiussat najoqqutaralugit nalilersuisinnaanngippata taava tusagassiuutilerineq ajornakusoortorujussuussagaluarpoq.

Taamaammat aviisiliortut akisussaasuusut pinnagit professorip eqqartuussivilersuunneqarnera, Mads Kæmsgaard Eberholstip tupigusuutigaa. 

AAMMA ATUARUK Sermersuup Siorarsiorfimmi suliniummut naleqqussaanissani piareersimaffigigaa

Tassami apersukkat allaaserisamik aaqqissuisussaatitaanngillat soorlu aamma qanoq issuarneqarnissaminnik qaqutiguinnaq aalajangeeqataasinnaasarlutik:

- Taamaammat inunnik ataasiakkaanik, soorlu uani professori pineqartoq, ilisimasatik aallaavigalugit nalilersuisunik eqqartuussivilersuussineq eqqarsarluannginneruvoq, Eberholst oqarpoq.

Tusagassiornermik ilisimatusarfimmi immikkoortortaqarfimmi pisortaq naapertorlugu kommunip suliassanngortitsinini nammineq ajutoorutigisinnaavaa.

- Taamaaliussagaanni nalunngittariaqarpoq eqqortumik tunngavissaqarluni, Naja Paulsen oqarpoq.

Kommuneqarfik Sermersooq KNR-imit oqaaseqartinniaraluarparput iluatsinnaguli.