Sermersuup Siorarsiorfimmi suliniummut naleqqussaanissani piareersimaffigigaa
Naliliinerli nalorninartortaqartoq kommunimit nassuerutigaat. Taamaattoq sinneqartoorutissat suliniutip imminut akilersinnaanissaanut naammassasut, atorfilittat isumaqarput, aamma suliniut pilersaarutigineqartumit allatut suliarineqartariaqassagaluarpat.
Suliniummi immikkoortukkaarlugu suliarineqassasoq, atorfissaqartitallu aallaavigalugit sanaartortoqassasoq kommunimit oqarput.
Kommuneqarfik Sermersuup Siorarsiorfimmi ineriartortitsinissamik pilersaarutaa piviusunngortinneqassappat, inuiaqatigiit aningaasaqarnerannut qanoq kinguneqassanersoq kommuni misissuititsisimavoq.
Tassanilu nalilerneqarpoq, suliniutip iluaqutissartai, minnerunngitsumillu isertikkumaagai, suliniummut aningaasartuutaasussanit amerlanerujussuussasut. Tassalu imminut akilersinnaassalluni.
Naliliinermili nalorninartortaqarpoq. Kommunemilu atorfilittat naapertorlugit, nalorninartut naliliinermi sillimaffigineqarput.
Nuummi najugallit amerlanerulernissaat illoqarfimmut ineriartortitsinissamik pilersaarummi tunngavigineqarpoq, naliliinermilu Nuummi 2030-mi najugallit 26.000-iunissaat aallaavigineqarluni. Naatsorsueqqissaartarfiulli naatsorsuutai qiviaraanni kisitsisit allaanerusut takuneqarsinnaapput, Nuummimi 2030-mi najugaqartut 21.555-iunissaat Naatsorsueqqissaartarfimmit naatsorsuutigaat.
Kommuneqarfik Sermersuulli aningaasaqarnermut pisortaata, Troels Pedersenip, Nuummi najugaqartussat 26.000-iunissaat piviusorsiorsoraa.
- Eqqoriaaneruvoq. Misissueqqissaarnermilli tunngavilersorneqanngikkaluarluni eqqoriaaneq tunngavilersugaasoq isumaqarpunga, Troels Pedersen oqarpoq.
Sanaartornermut maanna suliniutigineqartut, mittarfimmik talliliinissaq sinerissaminngaanniillu nuuttut amerlanerusut ilaatigut pissutaallutik Nuummi najugaqartussat Naatsorsueqqissaartarfiup naatsorsuutaanit amerlanerussasut, kommuninit nalilerpaat.
Nuuttussalli ikinnerussappata, taava suliniutip ilaata taamaatinneqarsinnaanissaa ilimagineqarpoq. Illoqarfimmut ineriartortitsinissamik pilersaarut ataatsikkut suliarinagu immikkoortukkaarlugu suliarineqassasoq, aggustimi nalunaarutigineqarpoq.
Taamaammat Troels Pedersenip suliniutip tunngaviatigut nalunartortaqarpallaarsorinngilaa.
- Taamaattoqarsorinngilara. Pissutsinut naleqqussaasoqarsinnaavoq. Najugaqartut 26.000-iussanngippata, taava paaqqinnittarfiit quliussanngillat, imaluunniit atuarfiit atuareersunullu paaqqinnittarfiit suliniummi maanna pilersaarutigineqartumit ikinnerussapput, Troels Pedersen oqarpoq.
