Professori Siorarsiorfik pillugu oqaaseqartoq Sermersuup eqqartuussivilersuukkaa
Roskilde Universitetimi professori, Ole Helby, ilaatigut ima oqarsimanini pillugu akuersaagaqartariaqarnerarlugu, Kommuneqarfik Sermersuup eqqartuussivilersuunniarpaa:
- Allanik aningaasaliisoqarnera kommunip sanaartornissamut aningaasaliissutaani inissaqartitsilerlunilu akissaqartitsilernissaanik tunngavilersuineq eqqunngitsuuvoq, professori Sermitsiaq.AG-mut ilaatigut oqarpoq.
Taamalu oqarnera kommunip pisortaata, Lars Møller Sørensenip iluarinngilaa. Taassuma - unnia politikerit ilisimanngisaannik - eqqartuussissuserisoq suliakkissimavaa, Ole Helby Københavnip illoqarfiata eqqartuussiviani suliassanngorteqqullugu.
- Najoqqutassatut politikerinut suliarisassanngortitarput angutip taassuma pulaffigisimanagu tusagassiortup oqaluttuarnera kisiat tunngavigisimagaa ersarippoq, Lars Møller-Sørensen eqqartuussivilersuussiniarneq pillugu l Sermitsiaq.AG-mut oqarpoq.
Sermitsialli allaaserisaani aggustip 18-aneersumi, Ole Helbyp oqaasiinik issuaaffiusumi atuarneqarsinnaavoq, professori allaffeqarfiup aningasaqarnermut inuussutissarsiornermullu ataatsimiititaliamut saqqummiussassaanik saqqummiussiffigineqarsimasoq.
Kommuni Helbymik aappassanik persarinnittoq.
Lars Møller-Sørensenip eqqartuussivimmi aalajangerneqaqquaa, Ole Helby-p akuersaassagaa, kommunip unnerluutiginninneratut nammineq kukkusumik tunngaveqarluni oqaaseqarsimalluni.
Kommunip Ole Helby Siorarsiorfimmik suliaq pillugu oqaaseqarneranut tunngasumik aappassaannik suliassanngortitsivoq. Kommuneqarfik Sermersuup professorip oqaaseqarnera pillugu Sermitsiaq tusagassiuuteqarnermi aalajangiisartunut maalaarutiginiarlugu apriilimi siorasaarivoq.
Taamanikkut oqarpoq, suliniutip aningaasalersornissaa eqqarsaatigalugu assigiinnaraa Danmark Storebæltimi pingasunik sisamanik ataatsikkut ikaartarfissualiorpat. Kommunimiit taamani oqarpoq, professorip oqaasiinut akissuteqarnissamut periarfissinneqarsimasariaqaraluarlutik.
- Kommunip aperinissaaanut pissutissaqarsorinngilagut. Immikkut ilisimasallip naliliineraa, taamalu oqarsinnaasariaarpoq, Sermitsiap aaqqissuisuunera, Poul Krarup, KNR-imut apriilimi oqarpoq.
