Kruse: Politikkikkut siunertarineqartoq aningaasanit pingaarnerusoq

Aalisarnermit sinneqartoorutit amerlanernut siammarternissaat pingaaruteqartoq, Karl-Kristian Krusep aalisarneq pillugu inatsisissatut siunnersuut sisamanngormat illersormagu oqaatigaa.
Assi © : Nauja Møller/KNR
aggustip 17-at 2017 16:52

Aalisarnermut naalakkersuisoq Karl-Kristian Kruse (S) aalisarneq pillugu inatsisissatut siunnersuut pillugu tusagassiortunik katersortitsigami aperineqaqattaartorujussuuvoq.

Krusep naalakkersuisoqarfiani atorfilittat siunnersuutit nassuiaataani allagaat apeqquterpassuarnut aallaaviuvoq. Nassuiaammi allaqqavoq, aalisarneq naammassisakiffiunerulissasoq nunattalu karsia 100 millionit koruuninit sinneqartunik annaasaqarsinnaasoq.

AAMMA ATUARUK Inatsisissatut siunnersuut nangiarnarpallaarpoq

Aalisarnermit sinneqartoorutit amerlanerusunut siammarneqarnissaat pineqartoq Karl-Kristian Kruse aningaasanik annaasaqarsinnaaneq pillugu oqarpoq. Tamannalu nunatta karsianut naalagaaffimmi tunisat ataatsimut nalingat naatsorsorlugit annaasaqaataasariaqassasoq.

Kisianni aalisarnermi amerlanerusut sulilerpata, taava aningaasaqarnitsinnut aamma iluaqutaasinnaasoq, Krusep aamma oqaatigaa. Tamannali aalisarnermut naalakkersuisoqarfiup atorfilittaanit, siunnersuummut nassuiaasiortunit tassa allaaserineqanngilaq.

Inatsit qanoq sunniuteqassava

Aningaasat pillugit nalorninermut atatillugu aamma allamik apeqquteqartoqarpoq: Aalisarnermut inatsit qanoq sunniuteqassava? Aningaasatigut kingunissaa inatsisissatut siunnersuutip nassuiaataani erseqqarivinngitsumik  allaaserineqarpoq.

Kruseli Naalakkersuisut inatsisissatut siunnersuusiornerminni nukingiussisimannginnerarpoq, inatsillu tunngavissaqarluarnerarlugu naak soqutigisaqatigiit Naalakkersuisullu akornanni oqaloqatigiinnerit unittoorsimasut Sulisitsisut Peqatigiiffiannit oqaatigineqaraluartoq. Aamma Sulisitsisut Peqatigiiffiat, KNAPK SIK-lu inatsisissatut siunnersuummut isornartorsiuereerput.

AAMMA ATUARUK Siunnersuut akisussaassuseqanngitsuliorneruvoq

Tamanna pillugu Karl-Kristian Kruse oqarpoq, Naalakkersuisut soqutigisaqatigiillu isumaqatigiissinnaasimanngimmata, Naalakkersuisut suliaq ingerlateqqinniarlugu inatsisissatut siunnersuusiorsiorsimallutik.