SIK: Inatsisissatut siunnersuut nangiarnarpallaarpoq

Naalakkersuisut aalisarneq pillugu inatsisissatut siunnersuutaat, maanna tusarniaassutigineqartoq, Sulisitsisut Peqatigiiffiannit, akisussaassuseqanngitsuliornerusutut taallugu, pingasunngornermi sakkortuumik isornartorsiorneqaqarpoq. 

Taakkuli kisimiillutik akerliliinngillat. Inatsisissatut siunnersuut nangiarnarpallaartoq, Sulisartut Kattuffiat, SIK, isumaqarpoq.

- Isumaqarpunga maannakkut nangiarnartorujussuaq taamatut aalisarnermut inatsit allanngortinneqarnissaa; nalugatsigu suna kingunerissaneraa, SIK-p siulittaasua, Jess G. Berthelsen, oqarpoq.

Inatsit atuuttoq suliffissaqartitsisoq

Aalisarneq pillugu inatsisissatut siunnersuut nunatsinnut akisusinnaasoq, inatsisissatut siunnersuummi oqaaseqaatini allassimavoq. Oqaaseqaatit naapertorlugit inuussutissarsiortut ukiumut 180 millionit annaasalersinnaavaat, tassa inuiaqatigiinni kaaviiaartitatigut allatigut annaasassat ilanngukkaanni.

Taamaammat Jess G. Berthelsenip aalisarnermut inatsit maanna atuuttoq naammagisimaarpaa.

AAMMA ATUARUK Siunnersuut akisussaassuseqanngitsuliorneruvoq

- Aalisarnermut inatsit atuuttoq aallaavigalugu maanna nunamut pilersuineq ajunngitsutut oqaatigineqartariaqarpoq, tassa ilaasortatsinnik suliffissaqartitsivoq. Ernummatigisarput uaniippoq, taamatut aalisarnermut inatsit, massakkut eqqarsaatigineqartutut, allanngortinneqassagaluarpat naluarput suna kingunerissaneraa.

Soqutigisaqartut peqataatinneqartariaqartut

Naalakkersuisut aalisarnermi suliffissaqartitsinerunissamik qulakkeerinninniarnerat killormut sunniuteqassasoq aningaasaliisartullu nalornilernissaat siulittaasup ernummatigaa.

- Taamaalillunilu aalisarneq unikaallatsinneqarsinnaalluni, tassami eqqaamasariaqarparput aalisarnermut inerisaanermut tunngatillugu aningaasarpassuit atorneqartariaqarmata.

AAMMA ATUARUK Aalisarneq pillugu inatsisissatut siunnersuut akisusinnaasoq

Aalisarnermut inatsisissatut siunnersuut atuutilersinnagu, soqutigisaqartut, tassalu SIK, KNAPK Sulisitsisullu Peqatigiiffiat, peqatigalugit sukumiisumik misissoqqaarneqarnissaa, sulinermik inuussutissarsiortut siulittaasuata GE-tulli ujartorpaa.

- Taamaattumik isumaqartunga peqqissaartumik massakkut, uani kattuffiit taaneqartut suleqatigalugit, aalisarnermut inatsisip iluani kikkut tamarmik inooqataaffigisinnaasaanik aaqqiisoqarsinnaasoq, SIK-p siulittaasua, Jess G. Berthelsen, oqarpoq.