GE: Siunnersuut akisussaassuseqanngitsuliorneruvoq

Aalisarneq pillugu inatsisissatut siunnersuut sulisitsisut peqatigiiffiannit, GE-mit, sakkortuumik isornartorsiorneqarpoq: Siunnersuut sukumiisumik suliaanngilaq, taassumalu nunarput piitsuunerulersissavaa.
aggustip 16-at 2017 12:27

Naalakkersuisut paasissutissat piviusut avaqqutaarlugit inatsit suliaraat, GE-mi pisortaq Brian Buus Pedersen oqarpoq.

- Aalisarneq naammassisakiffiusoq nunarsuarmi sumiluunniit amerlanerusunik suliffissaqartitsinikuunngilaq, Brian Buus Pedersen oqarpoq.

Naalakkersuisut aalisarnermi suliffissaqartitsinerunissamik amerlanerusullu aalisarnermit pissarsiaqarnissaannik qulakkeerinninniarnerat killormut sunniuteqassasoq taanna oqarpoq.

- Isumaqarpunga killormut sunniuteqassasoq. Avataasiorluni pisassiissutit sinerissamut qanittumi aalisagassanngorlugit tunineqarsinnaajunnaarpata naatsorsorsinnaavat susoqassanersoq.

AAMMA ATUARUK Aalisarneq pillugu inatsisissatut siunnersuut akisusinnaasoq

Piginneqatigiiffiit, soorlu assersuutigalugu Polar Seafoodip, avataasiorluni pisassiissutisiatik namminerminnut allanulluunniit sinerissap qanittuani aalisagartassatut tunisaraat, Brian Buus Pedersen oqaluttuarpoq.

Tassalu aalisariutit minnerit amerlanerusunik pisassaqartarput, aalisarnerat imminut akilersinnaanerulersillugu.

Inatsisissatulli siunnersuummi tamanna periarfissaajunnaassaaq. Tamatumalu kinguneranik piginneqatigiiffiit minnerit matusariaqalersinnaanerat, GE-p ernummatigaa.

Naalakkersuisut siunnersuutikkut aalisartut angusakinnerulersissammatigit, Brian Buus Pedersenip isoreqaa.

Taavalu aamma aningaasaqarnermut naalakkersuisoqarfik pisuussutinik atuinermut akitsuutissatut siunnersuuteqarpoq, taannalu aalisarnermit nunatta karsianut 60 millionit koruuninik pissarsissutaassaaq. Taamaaliussaagaannnili aalisarneq angusaqaataanerusariaqarpoq. 

Brian Buus Pedersen naapertorlugu aalisarneq pillugu inatsisissatut siunnersuut suliarilluagaanngilaq. Assersuutigalugu piginneqatigiiffiit sorliit sinerissamut qanittumi aalisagartassat, avataasiorluni pisassanit pissarsiarineqartussat,  pisiarisinnaanerannik apeqqut akineqanngilaq.

AAMMA ATUARUK Siunnersuut qularnerulersitsisinnaasunik imaqartoq

Naalakkersuisullu sukumiisumik misissuinissaat taassuma ujartorpaa.

- Aalisarnermut ataatsimiititaliamit martsimi 2015-imili piumasarineqarpoq, inuiaqatigiinni taama nalitutigisumik allanngortiterinnginnermi misissugassat tamakkivillugit misissoqqissaarneqassasut; inuussutissarsiuteqartut aningaasaliisartullu oqaloqatigineqarlutik. Tamannali suli pinngilaq, Brian Buus Pedersen oqarpoq, nangillunilu:

- Maannakkut taamungaannarsorput. Tamanna ulorianarluinnartutut isigaara, aalisarnermi nunatta karsianut aningaasarpassuarnik tunniussaqartarpoq. Taava napparsimmaviit, pisortat ikiorsiissutaat, inuussutissarsiornermik ilinniarfiit ilaalu ilanngullugit, aalisarnermit aningaasalersorneqartut, qanoq aningaasalersorneqassappat? Isumaqarpugut akisussaassuseqanngitsuliornerusoq, GE-mi pisortaq Brian Buus Pedersen oqarpoq.

Aalisarneq pillugu inatsisissatut siunnersuummut isornartorsiutit oqaaseqarfigitinnissai KNR-ip suli iluatsinngilaa