Politikerit: Nunap assingi pillugit Danmarkimut isumaqatigiissut nutarterneqassanngilaq
Kalaallilli Folketingimut ilaasortat isumaqarput Danmarkip maannamut isumaqatigiissutaasoq taamaatsillu ingerlatiinnassagaa.
Danmarkimi Geodatastyrelsemeersut nutaamik isumaqatigiissuteqaratik angerlariataarsinnaapput, Namminersorlutik Oqartussanut immap assinginik nutaanik 70-inik sanaartorniarneq eqqarsaatigalugu.
Taama oqarpoq Folketingimut ilaasortaq Aleqa Hammond:
- Isumaqarpunga qallunaat nunaata naalakkersuisui Nunatsinnilu Naalakkersuisut isumaqatigiissuteqareerput, tassalu Nunatta imartaata nalunaarsorneqarneranut suliap piffissap aalajangersimasup iluani naammassinissaanut isumaqatigiissutertik, taanna malitsiinnartariaqarpaat, Aleqa Hammond taama oqarpoq.
Aamma atuaruk Immap assingi pillugit nutaamik isumaqatigiissusiornissaq ministerip kissaatigaa
Folketingimi ilaasortaaqatini Inuit Ataqatigiinneersoq Aaja Chemnitz Larsenilu aalajangiusimavaat Danmarkip Nunatta Kujataata Kitaatalu imartaata digitalimik immap assiliornissaa pillugu isumaqatigiissut eqquutsillugu 2018-imi naammassineqarnissaa.
Isumaqatigiissutilli eqquutsinneqarnissaa ajornakusussaqaaq. Immamimmi assiliornermik suliallit suliffeqarfiata Københavnimiit Aalborgimut nuuneqarnerani atorfilinnit 15-iusunit 14-it atorfimminnit tunuarniuteqarsimapput.
Tamannali Kalaallit Nunaata ajornartorsiutissarinngikkaa Aleqa Hammond oqarpoq.
Aamma atuaruk Aleqa Hammond: Danskit Naalakkersuisuisa isumannaallisaaneq tunulliuppaat
Geodatastyrelse KNR-imut nalunaarpoq - nutaamilluunniit isumaqatigiissusiortoqaraluarpat - aatsaat ukiut arlallit qaangiuppata immap assingi naammassineqarumaartut, sulisussammi nutaat ilinniarteqqaartariaqarput tamannalu sivisusinnaavoq.
Kinguartitsinerli Danmarkip akisussaaffigigaa, taamaammallu Danmarkimit aaqqinneqartariaqartoq, Aleqa Hammond isumaqarpoq.
Kalaallit Nunaata imartaata assiliornerani nutarterinermi pisussaaffimminik naammassinnissimannginnera pissutigalugu Naalagaaffiup kukkunersiuisa siusinnerusukkut Danmark isornartorsiorsimavaa.
Geodatastyrelse nalunaarpoq Kalaallit Nunaata imartaata assiliornerani sulisussanik nutaanik atorfinititsiortorlutik.
