Aleqa Hammond: Danskit Naalakkersuisuisa isumannaallisaaneq tunulliuppaat
Allaammi immap itissusianik uuttortaanerit aallaavigalugit immap naqqata assingi 73-it 2018-imi naammassineqareersimasussatut isumaqatigiissutigineqartut naammassineqarsinnaannginnissaat paasinarsivoq. Danmarkip naalakkersuisuisa isumannaallisaaneq taamaalinikkut tunulliukkaat, Siumut sinnerlugu Folketingimut ilaasortaq Aleqa Hammond maanna oqarpoq:
Geodatastyrelsen illoqarfimmut allamut nuunneqarpat nunap assiliornermut tamanna akornutaasinnaassasoq aviisip Politikenip allaaseraa, tassami assersuutigalugu nunatta imartaanik uuttortaasussat immikkut ilisimasallit annaaneqaratarsinnaammata, Nunatta imartaanik uuttortaanissamut isumaqatigiissut naammassineqanngitsoorsinnaassalluni, imaluunniit kinguaattoorsinnaassalluni, Politiken allappoq.
Danmarkimi naalakkersuisuisa isumannaallisaaneq tunulliukkaat Aleqa Hammond isumaqarpoq.
- Naalagaaffimmi atorfiit nunatta imartaani uuttortaanermut tunngatillugu immikkut ilisimasalinnik inuttaqartut eqqarsaatigissagaanni, ajuusaarnaqaaq paasillugu qallunaat naalakkersuisui namminneq politikkikkut anguniakkatik salliutikkaat, Naalagaaffiup isumannaatsuunissaa tunulliullugu, Aleqa Hammond, tusagassiuutinut nalunaarummi ilaatigut taama allaaserisaqarpoq.
Issittup annertunerujartuinnartumik soqutigineqarnera eqqarsaatigalugu nunat assinginik ullutsinnut naleqquttunik peqarnissaq taamaammat pingaaruteqartoq Aleqa Hammondip oqaatigaa, Danmarkillu pingaarnersiuinermini nunarput kingulliuttutut ikkaa oqaatigalugu:
- Ullumikkut upalungaarsimanerput illersoruminaaqaaq aamma utaqqiinnarsinnaanngilarput annerusumik ajutoortoqarnissaa, kingusinaarsinnaagattami annaassinngitsoorlutalu, Siumut sinnerlugu Folketingimut ilaasortaq oqarpoq.
- Taamaammat nunatta imartaani uuttortaaneq pingaartinneqarluni naammaasineqartariaqarpoq, Aleqa Hammond naggasiilluni oqarpoq.
