Politiit qaangiuttoorutitik aningaasanngorlugit tigusinnaagaat
Politiit qaangiuttoorlutik sulisimasut, kissaatigigunikku qaangiuttoorutitik aningaasanngorlugit tigusinnaavaat.
Danskit inatsisinik atuutsitsinermut ministereqarfiat Inuit Ataqatigiinnersumut Aaja Chemnitz Larsenimut Folketingillu Eqqartuussiveqarnermut ataatsimiititaliaanut akissuteqarluni taama allappoq.
Danskit inatsisinik atuutsitsinermut ministereqarfiata ukioq manna novembarip 20-ani nalunaarutigaa politiit qaangiuttoornermut taarsiullugu sulinngiffeqaratik qaangiuttoorutitik aningaasanngorlugit tigussagaat.
Pingaartumik danskit politiivi qaangiuttoornermut taarsiullugu sulinngiffeqarnissamut akunnerit katersaat ukiuni kingullerni amerlasuupilussuupput, ilaatigut politeeqarfiit arlallit politiiminnik Danmarkip Tysklandillu killeqarfiannut nakkutilliiartortitsisariaqarsimammata.
Aamma pinerlunniaqatigiit akornanni akerleriinnerit Danmarkimullu peqqarniisaarniarnissamik sioorasaarutit pissutigalugit politiit suliassaqarnerusimasut, inatsisinik atuutsitsinermut ministereqarfiup ilisimatitsissutigaa.
AAMMA ATUARUK Politiit sulinngiffeqarluni angalasarneq isumaqatigiinngissutigigaat
Qaangiuttoorutissanilli katersarpassuit politiit kissaatigigunikku aningaasanngorlugit tigusinnaanngorpaat. Tamannalu Kalaallit Nunaanni Politiini politiinut qaangiuttoorsimasunut aamma atuuttoq, inatsisinik atuutsitsinermut ministereqarfik ilisimatitsivoq.
Qaangiuttoornersiat ukioq manna novembarimi decembarimilu tunniunneqassasut, inatsisinik atuutsitsinermut ministereqarfik ilisimatitsivoq.
AAMMA ATUARUK Politiip akissaatinut isumaqatigiissut nutaaq piluarigaa
AAMMA ATUARUK Assigiimmik akissarsiaqartitsinissaq politikerit qulakkeertariaqarpaat
AAMMA ATUARUK Isumaqatigiissutip assortuussutaanera Søren Papep akuliuffigerusunngikkaa