Politiit sulinngiffeqarluni angalasarneq isumaqatigiinngissutigigaat

Naalagaaffeqatigiinni politiit assigiimmik akissarsiaqarnissaat Kalaallit Politiivisa peqatigiiffiata ukiorpaalunni sulissutigaat.

Assigiimmilli isertitaqalernissamut noqqaaneq danskit naalagaaffianni nutarterinermut aqutsisoqarfianit itigartitsissutigineqarpoq. 

Kalaallit Nunaannilu politiinngorniarsimasunut akissaatinut isumaqatigiissut nutartigaq isumaqatigiissutaaqqammerpoq.

AAMMA ATUARUK Politiip akissaatinut isumaqatigiissut nutaaq piluarigaa

Nunatsinnilu politiinngorniarsimasunut akissarsiat Danmarkimi politiinngorniarsimasunit suli ikinnerupput.

Akissarsiat assigiilissagaluarpata sulinngiffeqarnermi angalanissamut ukioq allortarlugu akiliutittarneq atorunnaassasoq isumaqatiginninniarnermi paasineqarpoq.

Kalaallit Politiivisa peqatigiiffianni ilaasortat ilaasa aaqqissuussineq taanna attatiinnarusuppaat.

-  Atorunnaaraluarpat politeerpassuit akiliutsillutik angalasinnaajunnaassasut,  Jesper Fleischer oqarpoq.

Akissarsiaqarnerulerneq akiulitsilluniluunniit angalaneq

Sulinngiffeqarnermut atatillugu angalanissamik akiliutsittarnerup atuukkunnaarnissaanut isumaqataanngitsunut ilaavoq Nuummi politiassistanti Inutsiaq Lynge. Taassuma ilaquttanilu ukioq allortarlugu akiliutsillutik Danmarkiliartarnertik pingaartippaa.

- Feriefrirejse tigummerusunneruara akissarsiat qaffanneraninngaanniit, qaffaassutissaq annikippallaaqimmat. Naligiimmilli akissaateqalertoqannginnissaa akuerineqarsinnaanngilaq, suliagummi assigiipput, taanna KNR-imut oqarpoq.

Assigiimmik akissaateqalertoqaraluartoq akiliutsilluni angalasarnerup attatiinnarneqarnissaa taassuma piumasarineqarsinnaasoraa.

AAMMA ATUARUK Isumaqatigiissutip assortuussutaanera Søren Papep akuliuffigerusunngikkaa

Qaqortumili politiassistentip Karina Nielsen Rødgaardip isumaqatiginngilaa. Taassuma akissarsiat naligiilernissaat pingaarnerutippaa.

- Danskip aasaanerani maanga suliartortup aningaasarsiai takunikuugakkit 3000-it missaani uagut isertitakinneruvugut.  Sulinngiffeqarnermi angalanissamut akiliutsittarneq atorunnaaraluarpat akissarsiatigut imminut akilersinnaavoq.

- Danskit suleqativut naligalugit akissarsiaqarnissarput pisinnaatitaaffigaarput. Suliagummi assigiipput. 

Isumaqatiginninniaqqinnissamut eqqartuisoqassaaq

Assigiimmik akissaateqalernissaq Kalaallit Nunaanni politiit peqatigiiffianni siulittaasup Jesper Fleischerip amerlanerusut piumasarigaat oqaatigaa.

- Tapersersorneqarpoq. Ilaasortalli ataasiakkaarlugit tamaasa aperisariaqarpagut ilumut sulinngiffeqarnermi angalanissamut akiliunneqartarunnaarusunnersut.

AAMMA ATUARUK Akissaatit pillugit isumaqatigiissutip peerneqarnissaa Sara Olsvigip piumasarigaa

Inatsisinut atuutsitsinermut naalakkersuisup Sara Olsvigip Danskit inatsiseqarnermut ministeriaqarfianut assigiinngitsumik akissarsiaqartitsineq atorunnaarseqqullugu marsip qaammataani piumasaraa. 

Jesper Fleischerillu isumaqatiginninniartoqaqqinnissaanut ilaasortat isumasiorniarnerarpai.