Isumaqatigiissutip assortuussutaanera Søren Papep akuliuffigerusunngikkaa

Nunatsinni naalagaaffiup ataani tjenestemanditut atorfillit akissaatit pillugit nutaamik isumaqatigiissuteqarnissamik naalagaaffimmut isumaqatigiinniarnerat sivitsortoorutigineqartoq, danskit inatsisinik atuutsinermut ministeriata akuliuffigerusunngilaa. Suliarli pillugu Sara Olsvig oqaloqatigerusunnerarpaa.
Assi © : Folketinget
marsip 23-at 2017 15:12
Nutserisoq Simon Uldum -

Nunatsinni naalagaaffiup ataani tjenestemanditut atorfillit, ilaatigut Politiini Pinerluttunillu isumaginnittoqarfimmi atorfillit, akissaatit pillugit isumaqatigiissutissaq nutaaq pillugu isumaqatigiinniarnerat sivitsortoorutigineqartoq politikkikkut aalajangiiffigineqassanngilaq.

Danskit inatsisinik atuutitsinermut ministeriata Søren Pape Poulsenip KNR-imut tamanna naqissuserpaa.

- Tamakku akissaatit pillugit isumaqatigiinniarnerni eqqartugassaapput. Aamma inatsisinik atuutitsinermut ministeritut Moderniseringsstyrelsip suliassaqarfigisaa akuliuffigisinnaagunanngilara.

Nunatsinni naalagaaffiup ataani tjenestemanditut atorfillit akissaatit pillugit nutaamik isumaqatigiissuteqarnissamik naalagaaffimmut isumaqatigiinniarnerat 2015-imi naammassineqartussaagaluarpoq. Isumaqatigiinngissuteqarnerli isumaqatigiinniarnerullu ukiumi ataatsimi uninngasimanera pissutigalugu suli angusaqartoqanngilaq.

Eqqartueqatigiinnissaq Papep ammaffigaa

Naligiissitaanermut inatsisinillu atuutitsinermut naalakkersuisup Sara Olsvigip sisamanngormat nalunaarutigaa naalagaaffiup akissaatit pillugit isumaqatigiissutaata Nunatsinni tjenestemandinut atuuttup atorunnaarsinneqarnissaa kissaatigalugu.

Taarsiullugu Danmarkimi naalagaaffiup ataani tjenestemanditut atorfillit isumaqatigiissutaat Nunatsinni atorfeqartinneqartunut atuuttussanngortikkusuppaa. “Suliat assigiit, akissarsiat assigiit," Sara Olsvig taama oqarpoq.

Suliassaqarfimmi isumaqatigiissutip kalaallinut atuuttup atorunnaarsinneqarnissaa piareersimaffiginerlugu Papep akerusunngilaa, Sara Olsvigili eqqartueqatigerusuppaa.

- Naalakkersuisup Kalaallit Nunaanneersup Danmarkimi ministeri oqaloqatigerusukkuniuk asulersuaq takkunnavianngilaq. Oqaloqatigiissutigissavarput, taava imaassinnaavoq pitsaanerusumik angusaqarnissamut suliamik aallartitsisinnaassasugut, Pape taama oqarpoq.

Danmarkimi naalakkersuisooqatigiit tunngavissaanni allassimavoq, naalakkersuisut "Savalimmiuni Kalaallit Nunaannilu naalagaaffiup akisussaaffeqarfiini Savalimmiuni Kalaallit Nunaannilu pissutsit immikkoorutaasut najoqqutaralugit, Danmarkimi pissutsinut naapertuuttumik assigiissaarinissaq sulissutiginiaraat."

Danskilli inatsisinik atuutitsinermut ministeriata Nunatta Danmarkillu akornanni assigiinngissuteqarnera pissutigalugu naalagaaffimmi atorfilinnut akissaatitigut isumaqatigiissutit assigiinngitsut atorneqarsinnaanerat aalajangiusimavaa.

- Danmarkimi Kalaallit Nunaannilu neqeroorutigisatta, assigiinngissutaasut naapertorlugit imminnut naapertuuttungortinnissaannik anguniagaqarpugut. Matumani akissarsiat eqqarsaatiginngilakka, kulturikkulli assigiinngissutsit atuupput, soorlu Pinerluttunik isumaginnittoqarfik eqqarsaatigalugu. Danmarkimi Kalaallit Nunaannilu suliassanut assigiinngitsunik periaaseqartoqarpoq, ministeri taama oqarpoq.