Royal Greenland: Polenimi aninngaasarsiorsinnaanngilagut
Polenimi tunisassiorfitsik Koszalinimiittoq ukiuni qulini pigereersimasartik ingerlassinnaajunnaarsimallugu kalaallit aalisakkerivissuata pingasunngornermi nalunaarutigaa. Tunisassiorfiup aalisakkat suliassat amigaatigisimagaat suliffeqarfiup pisortaa nassuaavoq.
- Tunisassiorferujussuuvoq 1000-it sinnerlugit sulisoqartoq, taamali angitigigaluartoq nioqqutissiassat naammanngimmata aningaasanik isaatitsiniarneq ajornakusoorsimavoq, pisortaq, Mikael Thinghuus oqarpoq.
Naak tunisassiorfik aalisakkanik ukiumut 14.000 tonsinik nioqqutissiortarsimaluartoq Royal Greenlandimut iluaqutaanngisaannarsimavoq
- Naak ingerlalluarluni tunisassiorfitsialaagaluartoq aningaasanik iluanaaruteqarfiunngisaannarsimavoq.
AAMMA ATUARUK Royal Greenlandip tunisassiorfissuaq tunigaa
Royal Greenlandip Polenimi danskit aalisakkeriviat Espersen A/S sanileraa. Aalisakkerivik taanna nioqqutissiassaqarluarput, inissamilli amigaateqarlutik. Taamaammat suliffeqarfiit marluullutik isumaqatigiissuteqarput danskit suliffeqarfiutaata tunisassiorfik pisiarissagaa, isumaqatigiissutigalugulu tunisassiat Royal Greenlandip ullumikkut nioqqutissarisartagai ingerlatiinnassagaat.
Suliffeqarfiup Namminersorlutik Oqartussanik pigineqartup aalisakkat Espersen A/S-imit tunisassiarineqartut nunani tamalaani maannamiit tunisassiarilissavai.
Suliffeqarfiup tunisassiorfimmik tunisinera aalisakkanik kalaallit nunaata sineriaani pisarineqarsimasunik tunisassiorfinni suliaqartarnissamik siumut isigaluni iliuuseqarniarnermit peqquteqartoq, Mikael Thinghuus nassuaavoq.
AAMMA ATUARUK Royal Greenland kilisaatinik tunisassiorfittalinnik nutaanik pisisoq
Royal Greenlandip tunisassiorfini Wilhelmshavenimi Tysklandimiittoq 2013-imi tunisimagaa kingornalu Arctic Green Food piarisimagaa kiisalu kilisaatinut marlunnut nutaanut aningaasaliissuteqarsimasoq, Thinghuusip innersuussutigaa.
- Koszalinip tuninera piviusumik iliuuseqarnitsinni alloriarneq kingulliuvoq, tamanna ukiut arlallit matuma siorna aallartereersimavarput.
Maannakkulli naammassivoq.
- Tunisassiorfinnik allanik tunisassaqanngilagut, Royal Greenlandimi pisortaq, Mikael Thinghuus oqarpoq
