Assi: Royal Greenland

Royal Greenland kilisaatinik tunisassiorfittalinnik nutaanik pisisoq

Suliffeqarfissuaq aatsaat taama aningaasaliissuteqartigaluni kilisaatinik tunisassiorfittalinnik nutaanik pisivoq.

Kilisaatit tunisassiorfittallit Sisimiut aamma Qaqqatsiaq kilisaatinik nutaanik nutaaliaasunik taarserneqartussanngorput. Royal Greenland 2016-imut naatsorsuutiminik saqqummiussinerminut atatillugu taama ilisimatitsivoq.

Kilisaatit nutaarluinnaat 2019-imi tunniunneqassapput, suliffeqarfissuarlu allappoq katillugit 700 millionit koruuninik aningaasaliinikkut 'ingerlatseqatigiiffiup oqaluttuarisaanerani aatsaat taama annertutigisumik aningaasaliissuteqartoqartoq'. 

Suliariumannittussarsiuussisoqareernerani Spaniami umiarsualiorfik Astilleros de Murueta kilisaatinik marluusunik kilisaatinillu taarserneqartussanit anginerumaanik sanaartortussatut toqqarneqarpoq.

Kilisaatit tapertariissitsisinnaasut nutaat marluusut meterinik 83-inik takissuseqassapput, kilisaatit pisoqaanerit meterinik 66-inik 70-inillu takissuseqartut. Kilisaammut Sisimiunut taartissaq 1750 kubikmeterinik usisinnaassuseqassaaq, Sisimiut 1200 kubikmeterinik usisinnaassuseqartoq. Kilisaammullu Qaqqatsiamut taartissaq Qaqqatsiamut 1450 kubikmeterinik usisinnaassuseqartumut naleqqiullugu marloriaatingajammik, tassalu 2950 kubikmeterinik, usisinnaassuseqassaaq.

Kilisaatit nutaat

Kilisaatip Sisimiut taartissaa kilisaataassaaq tapertariissitsisinnaasoq, taannalu saarullinnik qaleralinnillu aalisartinneqassaaq. Aamma aalisakkat perlukuinik qajuusiorsinnaallunilu aalisakkat orsuannik tunisassiorfiusinnaassaaq.

Kilisaat Qaqqatsiamut taartissaq raajanik qaleralinnillu tapertariissitsilluni aalisarnissamut sanaajussaaq.

Tamannalu periarfissanik nutaanik ammaassissaaq, suliffeqarfissuarmi tunisassiornermi pisortaq, Lars Nielsen, atuagassiamut Navigatomut, Royal Greenlandimit saqqummersinneqartumut, taama oqarpoq.

- Kilisaatinik tapertariissitsisinnaasunik sanatitsiniarluta aalajangerpugut aalisariaasitsinut naleqqummata aammalu siunissami pisassiisarnerup ineriartortinnissaa eqqarsaatigalugu uatsinnut naleqqussarnerussammat.

- Kilisaatit useqarsinnaanerussapput, ungasissuliarsinnaassallutik aammalu inuttanut atugassaqartitsilluarnerusinnaassallutik, Lars Nielsen, kilisaatit Svalbardip, Ruslandip Nunattalu kitaata imartaanni aalisartussat pillugit taama oqarpoq.

Kilisaatit nutaat Royal Greenlandimut 2019-imi tunniunneqarpata kilisaatit Sisimiut aamma Qaqqatsiaq tunineqassapput.

Naatsorsuutit angusaqarfiulluartut

Royal Greenlandip ukiumoortumik naatsorsuutini pingasunngornermi saqqummiuppai. Akileraarutit ilanngaatigereerlugit 173 millionit koruuninik sinneqartooruteqarfiupput. Suliffeqarfissuaq naatsorsuutitigut aatsaat taama angusarissaartigivoq, 2016-imulli ukioq naatsorsuuseriffiusup qaammatinik 15-inik sivisussuseqarpoq.

Taamaakkaluartoq naatsorsuutit oqaluttuarisaanermi aatsaat taama angusaqarfiulluartigipput, suliffeqarfissuaq tusagassiorfinnut nalunaaruteqarluni taama allappoq:

- Qaammatit aqqaneq-marluk tunngavigalugit akileraannginnermi angusat siorna ukiumoortumik naatsorsuutini aatsaat taama pitsaatigisumik angusaqarfiusimasunit 20 millionit koruuninit amerlanerusunit qaffasinnerupput, Royal Greenland taama allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!