Pilersaarusiorluarneq savaatilinngortussanut qulakkeerinnittartoq

Kinguaariit nikinneranni akiitsut kingornussisussanut artukkiissanngippata pilersaarusiorluarnissaq naatsorsuutillu aqulluarneqarnissaat pisariaqarpoq. 

Savaatillip savaateqarfini ernerminut kingornussassanngorlugu piareersaleruttoraa taama siunnersuuteqarpoq.

- Kinguaariit nikinnissaat eqqarsaatigalugu akiitsoqarnaveersaarnikuuvugut, akiitsullu amerlavallaannginniassamata 
aningaasartuutigut nakkutigilluarlugit, Lars Nielsen 65-nik ukiulik Qaqortup kujataani Kangerluarsorujummi ukiuni 40-ni saaveqateqarsimasoq KNR-imut oqarpoq.

Aamma atuaruk Nunalerisut akiitsuinik isumakkeerinnittoqarnissaa kissaatigineqartoq

Savaateqarfimmi akiitsoqarpallaarnaveersarneq pingaaruteqarpoq.

- Aningaasanik aqutsineq, ukiumut pilersaarusiorneq, suna akissaqartinnerluni, budgetitut isikkulinnik najoqqutassanik peqarnissaq taakkualu najoqqutaralugit ingerlatsinissaq pingaaruteqartorujussuuvoq, Lars Nielsen oqarpoq.

Aamma atuaruk Neqi A/S ikioqquvoq

Kinguaarit nikinnissaannut ilaqutariit Kangerluarsorujummi savaatillik ukiuni kingullerni pingasuni piareersarput, erneratami Kunuup 34-nik ukioqalersussap savaateqarfik nangittussaammavaa.

Savat 600-it missaannik amerlassusseqartut Narsami Neqi A/S-ip toqoraavianut siorna tunineqarput.

- Savaateqarfiup kingornunneqarnissaanut nukingertoqassanngitsoq isumaqatigiippugut, taamaattumik ukiut pingasut sisamat kingulliit piareersarpugut, maannakkullu ernerput Kunuk illussaminik sanavoq ilaqutaqalersimallunilu, taamaattumik eqqississimasumik ingerlavugut, Lars Nielsen oqarpoq.

Savaateqarneq pillugu nalunaarusiat - ukiuni kingullerni saqqummiunneqartut tikkuarpaat, savaatillit amerlasuut akiitsoqarpallaarlutik aningaasatigut ilungersunartorsiortut.

Taamaannera savaateqarnerup ingerlaannarnissaanut ajornartorsitsivoq, tamatumalu savaateqarfiit ikiligaluttuinnarnerannik kinguneqarsinnaalluni.

Akiligassat nakkutigilluarneqarnissaat  savaatillip Lars Nielsenip ilaqutaasalu pingaartippaat.

- Akiitsoqalernaveersaarneq pingaartissimavarput maani savaateqarnitsinni, Kangerluarsorujummi savaatilik Lars Nielsen oqarpoq.
Savaateqarfiit naatsorsuutaanik aqutsinermik pikkorissartitsisoqartanerisigut ilaqutariit Nielsenikkut peqataasarput.

Aamma atuaruk Savaatilik: Nersussuit siunissaapput

Aamma atuaruk VIDEO Savaatilik akiitsunik kingornussisoq