Nunalerisut akiitsuinik isumakkeerinnittoqarnissaa kissaatigineqartoq

Nunalerinermik inuussutissarsarsiuteqartut amerlasuut Namminersorlutik Oqartussat inuussutissarsiutitigut taarsigassarsisarfiannit ESU-mit ikiorneqarlutik aningaasanik pissarsisarput. 

Akiitsorineqartut nunalerisunut arlaqartunut artukkiisimapput, taarsigassarsiat nunalerisut ilaannit akilerneqarsinnaanatik.

Siunnersuisoqatigiit piumasaqaatigaat ESU-mi akiitsutoqqat Naalakkersuisunit isummakkeerfigineqarnissaat. Taanna piumasaqaat Nunalerineq pillugu Ataatsimiititaliarsuup isumaliutissiissutaani inassuteqaataanilu pingaarnerit ilagaat. 

Siunnersuisoqatigiit ilisimavaat taamatut iliuuseqarniaraanni inatsimmik allannguisoqartariaqartoq. Taamaattumik Siunnersuisoqatigiit ilungersuutigaat kingusinnerpaamik Inatsisartut 2017-imi ukiakkut ataatsimiinnissaanut inatsimmik allannguutissatut siunnersuuteqartoqassasoq.

Sanngiinnerit iluaquserneqassasut 

ESU-mi akiitsutoqqat isumakkeerneratigut, savaatillik sanngiinnerusut akunnattumillu inissisimasut  malunnaatilimmik millisinneqassasut taamaalinikkullu malunnaatilimmik aningaasaqarniarnikkut oqilisaavigineqarsinnaapput ineriartornissamut periarfissinneqarsinnaallutik.

Siunnersuisoqatigiit isumaqarput Nunalerinermi inuussutissarsiornermi ESU-mut akiitsutoqqanik ajornartorsiuteqartunut pisortanit isiginngitsuusaarineq ineriartortitsinissamut aporfiusoq aammalu toqqammavissiinissamut kiisalu aserfallatsaaliuinissamut mattussisoq, Nunalerineq pillugu siunnersuisoqatigiit tusagassiuutinut nalunaaruteqarlutik taama allapput.