Neqi A/S ikioqquvoq

Savaaqqat toqorarneqartartut ukiuni kingullerni ima ikilisimatigipput allaat savanik akitsuusersorneqarsimasunik nunatta avataanit tikisitsisoqartariaqalersimalluni. Suliassaqartitsisoqarnissaa pillugu taama iliortoqarpoq, toqoraaviulli akiitsui maanna 70 millionit koruuninngorsimapput.

Neqi A/S-ip Narsami toqoraavia 2011-mi nutarterneqarmalli savat toqorarneqartartut ikiliartuinnavissimapput. Neqi aningaasarliulersimavoq, ajorneruleqqittariaqanngitsorlu, suliffeqarfiup pisortaata Per Jensenip oqaatigaa.

- Pitsaasumik angusaqarnissatta qulakkeerneqarsinnaanissaa qularnarsereerpoq, aap, Neqi A/S-ip pisortaa Per Jensen taama oqarpoq.

Amigartoortoqassasoq

Namminersorlutik Oqartussanut kiffartuussinissamik isumaqatigiissummut atasumik 2 millionit koruunit ilaareeraluartut amigartoortoqassasoq Per Jensenip oqaatigaa.

Savaaqqat 23.000-it, savallu piaqqiortut 1500-t ukiumut tunineqartarnissaat politikerit 2011-mi naatsorsuutigaat.

Savaaqqat toqorarneqartartut taamanikkulli ikiliartorsimapput, savaaqqallu siorna toqorarneqartut 18.400-uupput, ukioq mannalu immaqa ikinnerussallutik.

Aamma atuaruk Savat neqaasa pitsaassusaat nalunaaqutserneqartalissaaq

Savat piaqqiorsinnaasut 2300-t 2014-imi toqorarneqarput. Savaatillit ilaasa savaateqarnertik unitsikkusukkaat tamanna takutikkaa, Per Jensenip oqaatigaa:

- Savaatillit savaateqarnermik unitsitsisut uppernarsineqareerpoq, taamalu savaaqqanik savanillu piaqqiorsinnaasunik tunitsisarneq unitsikkaat.

Savaatillillu akiitsoqartut, tamannalu ajornartorsiutigigaat ilisimaneqarpoq.

Millionilikkaanik akiitsoqartut

Aalisarnermut, Piniarnernermut Nunalerinermullu Naalakkersuisoqarfiup nalunaarusiaa naapertorlugu savaatillit affaasa missaat ESU-mi millionilikkaanik akiitsoqarput. Tamanna pissutigalugu ineriartortitsinissaminnut ajornakusoortitsisut, Nunalerineq pillugu Siunnersuisoqatigiit siulittaasuata Niels Lundip, nammineq savaateqartup, oqaatigaa:

- Tassa kissaatigaarput piaartumik isumakkeerfiginneqqullugit, immaqaluunniit allatut aaqqissuussiffigeqqullugit maannakkut savaateqarfinnik ingerlatsisunut aporfiujunnaarniassammata, Nunalerineq pillugu Siunnersuisoqatigiit siulittaasuat Niels Lund, Qaqortup eqqaani Qanisartuuni savaatilik taama oqarpoq.

Savaateqarfiit kinguaariit tulliannut ingerlaqqinnissaannut akiitsut tassa pioreertarput, savaateqarnerullu ineriartorteqqinneqarsinnaanissaa taamaalinikkut ajornakusoorsinnaalereerluni.

Qinnuteqaat itigartitsissutigineqartoq

Neqi A/S-ip savanik nunanit allaneersunit eqqussuinermi akitsuutip atuutsinneqannginnissaa Namminersorlutik Oqartussanut qinnutigisimagaluarpaa itigartinneqarlunili, tamannalu pissutigalugu kiffartuussinissamik isumaqatigiissutini 3,5 millionit koruuninik ilaneqarnisssaa Neqi A/S-ip qinnutigalugu, qinnuteqaaterli Namminersorlutik Oqartussanit aamma itigartitsissutigineqarpoq.