Savat neqaasa pitsaassusaat nalunaaqutserneqartalissaaq

Neqi A/S-ip Narsami neqileriviani savanik toqoraaneq ullumimiit aallartippoq. Savat neqaasa pitsaasusaat apeqqutaatinnagit akilersuisarneq ukioq manna naggataasumik pissaaq.
Allattoq Nûno Isbosethsen
septembarip 19-at 2011 16:03

Tassalu savap neqqaarinnera qanorlu orsukitsiginera apeqqutaatillugit pitsaassutsimik tunngaveqartumik savatillit aappaagu 2012-miit akilerneqartalissapput.

- Savaaqqat neqaat orsoqarpiaratik pitsaasuugaluit, savatut orsoqarnerusutut akeqartinneqartarput, kingunerisaanik pisisartut savasiniarnerminni qinigassakinnerusarput. Pisisartugut tunisassiatsinnik qinigassaqarnerulerpata taava tunisatta annertunerulersinnaannerat pingaartipparput, Otto Nielsen oqarpoq.

Savat tunineqartartut aappaagumiit akikinnerulernissaat naatsorsuutigissavarput?

- Taamak oqartoqarsinnaanngilaq. Kisianni savat orsoqarnerusut savallu orsukinnerusut akimikkut assigiikkunnaassapput, Otto Nielsen oqarpoq.

Savat neqaasa pitsaassusaat nalunaaqutserneqartalerpat tamanna pisisartunut iluaqutaassasoq, Neqi A/S-imi pisortap Lars Møller Sørensenip oqaatigaa.

- Tassa sava pisiassaq, orsoqarnerunersoq, neqqaarinnerunersorluuniit pisisartumit ingerlaannaq takuneqarsinnaanngussaaq, Lars Møller Sørensen oqarpoq.

Narsami savanik toqoraanerup oktobarip naanissaata tungaanut ingerlanissaa naatsorsuutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq