Knr.gl-imi pilerisaarutit peerneqarput
Tamanna pivoq Ilinniartitaanermut, Ilisimatusarnermut, Ilageeqarnermullu Naalakkersuisoqarfik imatut nalileereersorlu: Tassa nittartagaq aqqutigalugu piseqqusaarutinik assigisaannillu nittarsaassinissaminut KNR inatsisitigut periarfissaqanngitsoq.
- Naalakkersuisoqarfiup kissaateqarnera soorunami malittussaavarput, naak inatsisip nassuiarneqarneranut atatillugu Naalakkersuisoqarfik isumaqatiginngikkaluarlutigu, KNR-ip pisortaanera Søren Lennert Mortensen taama oqarpoq.
Radiukkut tv-kullu aallakaatitsisarneq pillugu Inatsisartut Inatsisaat nr. 7, 8. juni 2014-imeersoq atulersinneqarsimasumi sumi sukkullu pilerisaarisinnaanermut atatillugu KNR-imut killissarititaasut allanneqarsimapput.
Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup naliliinera naapertorlugu knr.gl-imi saqqummersinneqartartut ”aallakaatitsinertut” isigineqarsinnaanngillat.
Inatsisit taakkorpiaat pillugit KNR-ip Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik ingerlaavartumik attavigisarsimavaa.
- Radiokkut TV-kullu aallakaatinneqarsimasut ilarpassui nittartagarput aqqutigalugu isiginnaarneqarsinnaapput tusarnaarneqarsinnaallutillu. Tamannalu uagut isumarput malillugu aallakaatitsinertut isigigaarput, Søren Lennert Mortensen oqarpoq imatullu nangilluni:
- Soorunami sullitatsinnut tamanna ajuusaarnarpoq, kisiannili peqquneqarnerput malittariaqarparput.
Matuma erseqqissaatigineqarnissaa pingaartutut isigineqarpoq, tassa KNR-ip radiokkut tv-kullu pilerisaarisarfiisa allannguuteqannginnerat.
Knr.gl siorna decembarip qaammataanili nittartakkamini marlunnik pilerisaaruteqarpoq.