Peqqissutsimut naalakkersuisoq pilersaaruteqanngilaq

Peqqinnissaqarfimmi kukkusoqarsimatillugu nakorsiat uninngasullu allattorsimaffiannut allanneqartarpoq. Nunatsinnili nakorsat kukkuneri kukkusumilluunniit nakorsaasiisimanerit ataatsimut kisitsisaatigineqanngillat. 

Nassuiaatitassaqarporli. Siunertarineqanngitsumik pisut nalunaarsorneqartarnissaat inatsisimmi pisussaaffiunngilaq.

Ajornartorsiutitaa aajuna, kukkussutigut suunersut nalugutsigit ilinniarfigisinnaanngilagut. Kisianni nutaamik suliniuteqarlutik, taama Peqqissutsimut naalakkersuisoq neriorsuivoq.

AAMMA ATUARUK Agathe Fontainip isornartorsiorneqarnini illuatungilerpaa

Danmarkimili peqqinnissaqarfimmit sullineqartut peqatigiiffiata siunertarineqanngitsumik pisut nalunaarsorneqatarneri nuannaarutigaat, kukkunerit taamaalillutik Peqqinnissamut Isumaginnitoqarfimmiit takusinnaammassuk. Taamaaliornikkut kukkunerit peqqinnisaqarfimmit sullinenqartunut allanut aamma tunnginnissaat pitsaaqutaalluni.

Kisianni peqqissutsimut naalakkersuisup Peqqinnissaqarfimmi kukkusoqarsimatillugu nalunaarsuisarneq pisussaaffinngortinniarnagu aalajangiusimavaa. Taassumami kukkunerit takussutissanngorlugit paasissutisssaasivimmut nalunaarsorneqartarnissaat pingaarsorinngilaa. 

Ilaannai kisimik nalunaarsuisassapput

Immikkoortortaqarfiilli aalajangersimasut kisimik siunertarineqanngitsumik pisut nalunaarsuisalissasut taanna isumaqarpoq.

 - Assigiinngitsunik afdelinngini qanoq taamattumik kukkusumik pisoqarsimatillugu taava nalunaarsuisalernissaq taavalu taamaalillugu siunertaralugu una kukkusigumatta massakkut taava tulliani kukkoqqinnginniassagatta taava suleriaaserput qanoq ittuussava?, Agathe Fontain taama oqarpoq.

Suliniutimili nutaaq immikkuualuttorttaanik oqaluttuarumanngilaq, oqaannarluni suliaq allaffissornikkut aallartereersimasoq, ukiullu tulliani atuutilissasoq.

Naak kukkunerit paasissutisssaasivimmut nalunaarsorneqartalernissaannik pilersaaruteqanngikkaluartoq, siunertarineqanngitsumik pisut peqqinnissaqarfiup iluani allagaaatinngorlugit nalunaarsorneqartalissasut, taakkualu Peqqinnissaqarfiup ilinniarfigisassagai, naalakersuisoq neriorsuivoq. 

- Kisitsisaatigilissavagut taakkua nalunaarsukkat immikkoortukkuutaanik immersorneqartartussaasut pinngitsooratik pigilertussaassagatsigit.

Peqqinnissaqarfimmiit ilisimatitsissutigaat napparsimaveqarfiit ilaasa siunertarineqanngitsumik pisartut nalunaarsortaraat, nalunaarsuinerilli KNR-ip allagaatinik takunnikkumanerani takutikkumanagit.