Peqqinnissaqarfimmi kukkunerit nalunaarsuusiarineqartanngillat
Peqqinnissaqarfitsinni kukkusumik nakorsaasimagaanni, kukkunerit, siunertaanngitsumik sulianik taaneqartartut, immikkut nalunaarsorneqartarput.
Kukkunerilli ataatsimut nalunaarsorneqartarnatillu nalunaarsuusiarineqartanngillat. Peqqissutsimut Pitsaaliuinermullu Aqutsisoqarfik KNR-imut taama akissuteqarpoq.
Tamannalu ajornartorsiutitaqarsinnaavoq, kukkunerimmi ilikkagaqarfigineqarsinnaaqisut, Danmarkimi misilittakkat takutippaat.
Kukkuluttornerit pillugit nalunaarsuusiortussaatitaannginneq pissutigalugu tamatigut nalunaarsuisoqarneq ajortoq, aqutsisoqarfiup akissutigaa.
AAMMA ATUARUK Sundhedsvæsenet mangler grønlandsktalende arbejdskraft
- Inatsisitigut suli pisussaaffeqannginnatta siunertaanngitsumik suliaqartoqarsimatillugu nalunaarsuisanngilagut, Peqqissutsimut Pitsaaliuinermullu Aqutsisoqarfik allappoq.
Danmarkimi siunertaanngitsumik suliat nalunaarsorneqartarput.
Danmarkimilu peqqinnissaqarfimmi sullinneqartut peqatigiiffiat, Danske Patienter, isumaqarput tamanna sakkussaasoq pingaaruteqaqisoq. Kukkuluttornerimmi ilikkagaqarfiginerisigut, napparsimasut siunissami isumagineqartut assinganik pineqarnissaat pinngitsoortinneqassasoq, peqatigiiffimmi pisortaq oqarpoq.
- Suut kukkussutigineqartarnersut katersussallugit pingaaruteqarpoq, napparsimmavinni kukkuluttorfiusimasuni ilinniarfigineqartarniassammata. Taava kisitsisinngorlugit pineqarsinnaappata, kukkussutigineqartut siunissamut ilinniarfigineqassapput, peqatigiiffimmi pisortaq Morten Freil oqarpoq.
Misilittakkallu takutippaat, Danmarkimi kukkusumik nakorsaasersuisoqartarsimaqisoq, Morten Freil paasissutissiivoq.
Napparsimmavinnilu assigiiaajunerusunik kukkusoqartarmat kikkut tamarmik eqqaamaniagassaannik nalunaarsuisoqarsinnaavoq, taamaasiornikkummi qanoq kukkusoqartarneranik qanorlu tamakkua pinngitsoortinneqarsinnaanersut ilisimasaqarfiginerulerneqarsinnaavoq:
- Peqqissaasup kukkunini kisiat ilinniutigippagu naammanngilaq, misilittakkap siammarternissaa pingaaruteqarpoq, Morten Freil oqarpoq.
Peqqinnissaqarfinni kukkussutigineqakulasut nakkutigineqalernissaat qanoq qulakkiissanerlugu, Peqqinnissaqarfiup aqutsisoqarfiata oqaatigisinnaanngilaa.
Mailikkulli KNR-imut allappoq, siunertaanngitsumik suliat ilinniuteqarfigineqarnissaat siuttuusut qulakkiigassarigaat.
Siunertaanngitsumik suliat ilinniutigineqarniassammata napparsimmavinni ataasiakkaani allagaatigineqartartut, Peqqissutsimut Pitsaaliuinermullu Aqutsisoqarfiup erseqqissaatigaa.
Taakkuli sunik imaqarnersut oqaatigissallugit kissaatinngilaa.
