Peqqinnissaqarfik: Illersuuteqaratik atoqatigiittartut amerlavallaarput

Ukiuni kingullerni tallimaannarmi nappaammik syfilisimik tunilatsissimasut 96-iupput, illoqarfinnili Maniitsumi, Sisimiuni Ilulissanilu atugaanerusimalluni.
aggustip 19-at 2015 17:50

Nakorsaaneqarfimmiit ukiumoortumik nalunaarusiamit aammalu nunatsinni kinguaassiutitigut nappaatit, nakorsanit pingasunit misissorneqarmata tamanna paasinarsivoq.

- Pingaaruteqarnersaavoq: pinaveersaartitsineq, taanna kisimi aqqutissaavoq. Tassa una oqaluttuassartaa tassaavoq, kinguaassiutitigut nappaatit ikiaroornartoq imigassarlu, imminnut taakku tassaammata ataqatigiilluinnartut.

- Aperisarpagut inussiarnersumik soormitaavaana usuup puaanik atuinngitsoortartusi? Akissullu ataasiinnaq tusartarparput, tassalu imigassartornikkut imaluunniit ikiaroornikkut usuup puuanik atuinngitsoorneq aqqutaasarsimasoq, Maniitsumi napparsimaveqarfimmi peqqissaasoq, Karoline Rosing taama oqarpoq.

Taanna illoqarfigisamini syfilissimik 2012-mi tunillaassuunneq akiorlugu peqqissaaneq, 2014-milu tunillatsissimanngitsunik kingunilik misilittagaqarfigaa.

Aamma atuaruk Syfilis tuniluuteqqileratarsinnaasorigaat

Taannaattumik Karoline Olsen isumaqarpoq, kinguaassiutitigut nappaatit oqallisigineqarnerisigut pinaveersaartitsinikkut inuiaqatigiinni tuniluutinnginnissaat akiorneqarsinnaasoq:

- Oqallisigiuaannartariaqarpoq. Oqallisigiunnaaraangatsigu aamma maani pinaveersaartitsiunnaaraangattalu takulereerparput kinguaassiutitigut nappaatit naartuersittullu tassa amerlasoorujussuanngoriasaartut, Karoline Rosing oqarpoq.

Illoqarfinni pingasuni ukiuni tallimani kingullerni syfilisimik tunillaassuuffiunersaasut ilaanneersup, Ilulissat napparsimavianiit nakorsap oqaatigaa, syfilissertut amerleriarsimaneri malunnaateqarpoq, taamaattumik iliuuserisatik annertusillugit, tunillatsissimasullu maanna ujartorlugit:

- Siorna ukiup naalernerani malugaarput syfilisimik tunillatsissimasut aatsaat Kalaallit nunaanni taama amerlatigisut, aamma Ilulissani taamaassimavoq. Taamaattumik iliuuserisagut annertusivagut, tunillatsissimasunillu atoqateqarnikut attavigiortorlugit, Ilulissat napparsimaviani Nakorsat pisortaat, Luis Penninge oqarpoq.