Sara Olsvig: Naalakkersuisut Camp Century pillugu erseqqissumik akissuteqartariaqarput
- Nunatsinnit politikkikkut erseqqissumik oqariartornissaq aallaqqaaterpiaaniit pisariaqarsorigaluarparput. Uanili akissutini erseqqinngittumik iliuuseqarniarpalaanngitsumik akissuteqarnera assut pakatsinarpoq, Sara Olsvig oqarpoq.
Camp Century avannaata avatangiisiinut mingutsitserujussuarsinnaasoq, ilisimatuutut misissuinerit nutaat takutippaat. Tamannalu pillugu Naalakkersuisut qanoq iliuuseqarniarnersut, Sara Olsvip paragraf 37 atorlugu apeqquteqaatigaa. Naalakkersuisulli Vittus Qujaukitsup akissutaa Olsvigip naammaginngilaa.
Qanoq mingutsitsisoqartigineranut misussuinissamut saliinissamullu Danmarkimit USA-miilluunniit akisussaaffigineqarnerasoq, Naalakkersuisut ukiuni arlaqartuni danskit naalakkersuisuinut akissutissarsiniarsarisimagaat, Vittus Qujaukitsoq allappoq, Naalakkersuisullu akisussaaffimmik inissiiniarneq sulissutigiinnassagaat ilanngullugu allalluni.
Tamannali naammanngitsoq, Sara Olsvig isumaqapoq.
- Nunarput, Naalakkersuisut siuttoralugit saliisoqarnissaanik erseqqiivissumik oqariartortariaqartoq, Inuit Ataqatigiinnit isumaqarpugut.
Amerikamiullu sakkutooqarfigisimasaat qimaannarneqarsimasut arlaqarput. Aamma taakku salinneqassasut, Sara Olsvig isumaqarpoq.
- Aamma Camp Century kisimi pineqanngilaq. Sorapassuit allat, amerikiamiut sakkutooqarfigisimasaat sumiiffiit salinneqartussaapput, taakkulu aamma silap pissusiata allanngoriartorneranit mingutsitsinerat naatsoruutigineqartumit annertunerusinnaagamik suliaq massakkorluinnaq aallartittariaqarpoq.
Aamma atuaruk Danmarkip Camp Century akisussaaffigaa
